今時今日大學生都會做吓實習（Intern），務求增加多啲工作經驗。既然係咁，好像高盛一定係學生夢寐以求嘅工作地方，不過公司就流傳咗10條實習生戒律，有一條就係要實習生做公司最遲走嗰個。
各位同學，唔使驚，聽埋落去先！原來今年高盛喺六月招募咗2,900個暑期實習生，但係有鑑於公司旗下一個初級銀行家喺投訴工時長之後無故身亡，又有上述嘅恐怖規條流出，今年高盛就開咗一條新例，規定實習生喺夜晚12點至朝早7點都唔可以喺公司，確保員工有足夠休息時間。咁樣講嚟，高盛都算係一家良心企業！
講開良心企業，以下有另一宗案例。話說近日，Netflix嘅CEO黑斯廷斯（Reed Hastings）就分享咗自己與其前公司CEO之間嘅故事。
話說佢畢業後加入咗一間初創企業做電腦程式員。佢常以咖啡提神，又懶洗杯，桌上堆滿污糟咖啡杯。但好神奇地，每隔一段時間，啲杯都會喺一夜間「被清洗」，乾淨地放桌上。佢後來發現過去一年間默默幫佢洗杯嘅，竟然係公司嘅CEO！當佢查問咁做嘅原因，呢位CEO畀咗一個足以令黑斯廷斯今日仍銘記心中嘅答案：「你為公司盡心盡力，我唯一可以為你做嘅就只有咁！」絲絲聽到都有啲眼濕濕。
余絲韻