絲絲講場：融創孫宏斌嫌自己賣樓貴
融創（01918）尋日為旗下位於北京三環嘅新盤「北京壹號院」搞發布會，公司形容係頂豪豪宅，即係豪宅中嘅豪宅，每套總價介乎4,000萬元（人民幣‧下同）至7,000萬元，最貴個套戶型每平方米要40萬元！
不過，問到公司主席孫宏斌會唔會留番套畀自己，佢就話「我也想買，但太貴了！」咁咪即係倒自己米？
雖然融創最近併購都唔成功，但孫總心情仍然很好，問到公司多咗錢有咩打算？佢竟然話「吃好點！」
今年目標戒煙
對於融創最終放棄收購佳兆業（01638），孫總話持平常心看待，強調併購很複雜，涉及政府及監管機構，做生意沒有成敗可言，交易做不成是正常的，「不需要後悔。」就如當初沒提出併購綠城（03900），就買不到融綠合營公司的項目，強調只不過是各取所需。
最後，問到公司今年有咩目標，孫總好似都係唔想講太多公事，話自己今年嘅目標係戒煙，因為之前搞併購食多咗煙，所以希望今年可以成功戒煙咁話！
余絲韻