絲絲講場：馬雲搞機械人好有Heart
機械人入屋成為家居生活一部分，已經唔係科幻片情節，軟銀（SoftBank）為拓展這個新市場，已透過新公司SoftBank Robotics（SBR），開發以人類夥伴為目標嘅機械人Pepper，並將於明日在日本正式開賣，但只係第一步。
阿里鴻海各注9億撐軟銀
事關軟銀已經宣布，分別來自海峽兩岸的阿里巴巴及鴻海集團，將分別向SBR注資145億日圓（約9.16億港元），成為各持SBR 20%股權的合作夥伴，標誌孫正義、馬雲及郭台銘這三位科技巨頭結義，正式在新興的機械人產業中聯手。
為了替Pepper造勢，軟銀主席孫正義、阿里主席馬雲及鴻海總裁郭台銘，周四在東京共同主持Pepper正式推出的發布會。孫正義話SBR引入阿里及鴻海為股東，是要配合Pepper開拓國際市場的計劃。而作為孫正義嘅老拍檔，馬雲就大讚Pepper具備情感反應，是有Heart之作，又話在未來機械人一定會比人類聰明，但人類與機器的最大分別就是有Heart，而將兩者結合可能就是「人類第四階段的時代革命」咁話！
機械人明賣 價萬幾
講咗咁耐，Pepper究竟賣幾錢先，孫正義就公布會以19.8萬日圓（約1.25萬港元）開賣，而首批Pepper只有1,000台左右。萬幾蚊咁抵，係唔係好想去日本搶番個先？不過咪咁興奮住，因為據之前已披露的資料，用家必須同時使用軟銀提供月費近1,000港元配套計劃，才能使Pepper在你家中順利「快高長大」。
而呢套模式，就是SBR在拓展國際市場上，要引入阿里同鴻海為合作的主要原因之一。不過有一點可以肯定，就係透過阿里與鴻海，大中華地區幾乎肯定是Pepper下一個階段將會拓展市場。
余絲韻