Market Insight：科網股炒作題材多

據彭博統計，最多經濟師預測九月美國會發生第一加，不過聯邦基金利率期貨、期權計出概率顯示，賭真金白銀的，認為最大機會係今年底，十二月十六日的議息會，耶倫先會出手。

舊年下半年到今年三月，人人睇死美國加息殺到埋身，資金蜂擁回流美元資產，美匯指數由80水平，狂升到三月份見100.7，創十二年新高。但愈近九至十二月的加息期，近排美元反而有反高潮現象。

今年三月至今，美匯三個頂位有一個低過一個的趨勢，執筆時美匯指數得93.7，高位計累積已貶值7%。十年期美債息都由2.5厘高位，落返去隔的晚2.26厘收，係咪市場對息魔出動預期確認，趁機出貨鳴金收兵？抑或睇死聯儲局在歐日持續量寬，美金由低位大反彈對經濟冷卻作用漸現，睇死佢最終加息只會係一次起，兩次止？暫時睇兩個可能性都同時存在。

港股成交愈玩愈縮

昨日港股早市悶到發慌，上午散場時，睇番無論成交與波幅都毫無睇頭。然而，真係估唔到下晝市況會峰迴路轉，中午政改踩turbo一樣，比預期更快進入表決，跟手建制派表決時搞出個世界級笑話，結果期指重開，好淡友開價亂晒龍，十五分鐘內先急插後急抽，之後陰陰落，收市恒指跌59點報26,694點，主板成交得1,062億元，是四月港股大時代以來最奀。

其實以A股的跌幅，早排唔跟升的港股跌得算少。但問題是四月至今，無論基金大戶與缸邊友，都諗住有買貴無買錯，因為之後有中國大媽落嚟接火棒，今日唔單止大媽與公募基金未見影，A股仲有腳仔軟迹象，短期港股要炒番上去，幫27,000至28,500點的巨型密集蟹貨區鬆綁，只怕唔係咁容易。

網龍收購加快發展

逆市奇葩華潤創業（00291），昨一升就8.2%收報25.8元。多得里昂出報告唱好，話佢首季啤酒銷售按年有8%增長，遠勝銷售倒退的青島啤酒（00168）。

喺出售零售業務以啤酒主打之後，睇好華創畀目標睇28.08元。或者個市無乜古仔好炒，議息後紐約期油落返去60美元樓下（以56至62美元之間橫行個半月之久，實在用唔上急跌去形容油價走勢），但炒鬼有理無理，東航（00670）、南航（01055）各升4.6%及5.2%。

當中見東航即市作勢想升穿近月的橫行區，可惜即市由6.89元高位撻番落6.5元，收得唔算靚，今日又睇吓破唔破到四月初高位6.8元。古勝昨日評混改好處會係心理大於實際，話口未完，炒消息的交行（03328）捧場客有收兵迹象，昨再跌2.3%收7.75元。

計計數，近期襟炒都算係「互聯網+」概念。騰訊（00700）及阿里巴巴近排表現一般，不過二線的IT翹楚，走勢頗標青。上星期提到網龍（00777），股價成功破10日線，升7.7%收36.75元，向住四字頭目標進發。網龍啱啱宣布向英國上市的教育問題方案供應商Promethean提出要約，收購價上限1.3億美元，收購規模大約等於網龍市值6%左右，但朝着教育的方向投資，吸引到芬佬胃口。

金軟短線似已見底

另一心水金山軟件（03888），早排發完可換股債券，再加埋月初在27.4元批股攞錢，果然有「濕平」跟尾，同網龍一樣「走出去」，收購納市掛牌的世紀互聯全部股份。該公司主要從事管理式網絡服務、雲服務等，隨着中國科網股估值愈來愈高，除了騰訊同阿里，今日連金軟都開始玩高估值批股要錢，再買入資產維持未來增長的遊戲。

芬佬就至鍾意呢類古仔，睇番金軟早排批股撞啱跌市，股價潛到26元樓下，經過一輪收集，有迹象短期做好個W底反彈，昨日返回10日線及批股價樓上，走勢漸見改善，如果上番去批股首日高位29.05元，證明新貨源入咗強手之中，短期可以留意。

古勝