大家都知，依家內地人少咗帶現金同銀行卡出街血拼，皆因阿里巴巴關聯嘅「支付寶」、騰訊（00700）嘅「財付通」等支付平台發展好快，一個帳戶在手就掂晒，呢方面香港有排都追唔上。
所以繼阿里之後，騰訊嘅「財付通」都不甘示弱，尋日公布同莎莎（00178）合作，會喺莎莎香港100間分店推出微信支付，仲係騰訊全球第一家跨境線下支付嘅合作夥伴添！相信有更多香港零售商合作陸續有嚟。
事實上，阿里之前已經率先同好幾間香港零售商合作開埋「支付寶」跨境支付，為好多內地人提供方便，之但係究竟有幾多人會用嚟支付就不得而知囉！不過，香港人就得個恨字喇，因為我哋都開唔到呢啲支付帳戶。
余絲韻