Market Insight：炒混改要轉身靈活

希臘債務談判進入最後直路，但就削減退休金問題上，同IMF的立場仲係大纜都扯唔埋。希臘市民開始識驚，怕最後希臘會被迫出歐元區，存戶紛紛將貨幣轉換成網絡虛擬貨幣比特幣（Bitcoin），刺激過去兩年1比特幣兌美元由1,230美元狂瀉八成六，最低去164美元水平，比希臘國債更垃圾的虛擬貨幣失驚無神死貓彈，周二晚狂升7%。

照現時劇情發展，古勝仲係相信，希臘九成機會態度軟化，再一次跪低，要求IMF施以援手，縱然窮得慌了的希臘民眾，年初將反緊縮主張的左翼聯盟領袖齊普拉斯推上總理一職，財政千瘡百孔的希臘，真係無針無線神仙難變，齊普拉斯除咗談判桌上攞出一副流氓賴債姿態，最叻係於facebook上unfriend德國總理默克爾之外，可以做的真係唔多。

希債可望大步檻過

上周民調顯示，過半數希臘民眾唔滿意談判發展，77%希望能夠達成協議，讓希臘留在歐元區內，在在可見年初強硬的左翼支持者轉軚者眾，缺乏民意支持，等於齊普拉斯同人晒冷前已經被對手揭了底牌，仲邊度有成功偷雞的可能，相信最後大步檻過的機會亦相當之大。

A股連續兩日急插後，昨出現後抽，港股亦跟升，可成交唔配合，主板交投啱啱過1,200億元，比周二跌市仲奀。大市升幅不足1%，恒指升187點收報26,753點，大市依然係仲有氣無力。昨日焦點係交通銀行（03328）混改方案獲國務院批准，股價朝早係威係勢，高開0.44元以8.25元成第一口價，亦係全日高位所在，最後收報7.94元，升0.13元。

市場趁好消息出貨，亦唔係無道理。事實上，唔少外資行睇死混改行唔通，一方面國家要保有控股，管理的絕對地位，又想引入民營資本。

說穿了，情況同當年國有銀行陸續進行股份制改革後安排上市，引入外資策略股東分別根本唔大。回望今天，除了錢多無碇洗的淡馬錫仲對內銀不離不棄之外，其他四大國有銀行的外資股東，統統賣股而去矣。

母企上市 聯想下行

文化差異下，入股後根本是同床異夢，達唔到原先構思，引進西方管理發揮協同作用的效果。基於近半年任何口號式改革都炒得一陣陣，連南北車合併都炒出完全唔合理的過萬億元天價市值，之後先爆發A股股民第一跳（樓），短期股市傻錢或者會追住混改古仔去炒，但長遠恐怕失敗收場機會都幾大。

近期IPO之焦點，非數聯想集團（00992）阿媽聯想控股（03396）上市莫屬。聯控的「畀面派對」確係架勢，24個基礎投資者陣容鼎盛，平保（02318）、中國人壽富蘭克林、彤叔及中再資產管理等都在名單內。

不過，聯想唔單止無出現子憑母貴情況，在阿媽籌備上市期間弱過藥煲，昨日收市價11.06元計，恒指都未衰到跌返去四月八日中證監放公募基金入市的起步位，聯想卻已低於四月二日收市價11.2元。

聯控持有聯想30.56%股權，IT貢獻佔69%，較重秤的資產包括地產發展商融科智地、兩間金融公司弘毅投資及君聯資本，去年房地產佔盈利比重12.5%，金融服務13.8%，另外現貨服務，包括口腔醫療、物流、養老院及聯營公司神州租車（00699）歸入現代服務，佔比重13.8%，另外仲有還未止血的農業食品、化工與能源材料投資。

綜合型企業不吃香

毫無疑問，聯控是巨擘級的綜合民企，但目前上市企業走向專門化，以分工精確作重點發展，爭取較高估值的潮流下，綜合型企業有點不合時宜。簡單講，如果憧憬聯想IT業務，未必想配搭房地產及投資公司一起押注，相反亦然，尤其見預期市盈率同屬綜合企業的復星國際（00656）要高，假如在定價範圍中上游拍板，吸引力只屬一般。

反而聯想近月受市況及基金換貨部署影響，估值返到稍低於五年中位數的16倍樓下，似乎值博率仲高些少，短線先以12.5至13元為目標。

古勝