絲絲講場：招証驗證邪過丁蟹
A股近日恐怖過「大時代」，尋日滬綜指連破兩關大跌3.4%，令A股股民心驚膽跳，而與港股「丁蟹效應」有異曲同工之妙嘅，正正就係內地招商証券尋日舉行嘅半年一度嘅策略會，因為招商証券又再一次驗證，「港股有丁蟹，A股有招商」呢句話，A股自然難逃劫數。
策略會睇升 你信嗎？
可能貴為內地股市名燈，招商証券首席經濟學家丁安華喺策略會開場第一句，佢就話：「相信大家都做好了（跌市）應對才來」。此話一出，真係唔知好嬲定好笑！之不過，雖然招商証券策略會又搞冧個市，但策略會裏頭究竟有啲乜嘢講？原來招商証券策略研究團隊認為，內地經濟在第二季度末、第三季度初會止跌企穩。總體而言，投資者仍可以喺下半年享受牛市咁話，但講明當中會夾雜泡沫！敢問散戶們，你地信唔信好呢？
無論如何，依家內地股民早已將招商証券當成A股嘅大殺器，唔到你唔信邪！好似你睇番過去近四年嘅招商証券策略會，以及近三年嘅年中策略會，結果發現，全部策略會召開前後A股都畀人做淡，大盤必跌，今次亦唔例外。
網民詐型 促開少啲會
之不過，唔知係咪輸得甘，有網民話，招商証券已係外資搖籃，成唱空及做空中國嘅基地，招商証券策略會最好以後改喺周末才開，又或索性不如一年只搞一次，何解？網友笑言，輸少次當贏吖嘛！
余絲韻