Market Insight：撈貨毋須太過心急

國企指數昨跌369點更為慘烈，經已回補第二個上升裂口，國指更睇住A股形勢，但暫時弱市睇弱，看不出反彈條件，甚至傳埋深港通延遲通車；深港通同時成為好友和淡友手上武器，幾時通車都可以殺上殺落，同美國幾時加息有異曲同工之妙。

昨日大市主板成交1,231億元，周四、五通常較利港股，希望政改塵埃落定後，又冇乜大件事發生，加埋憧憬內地三日假期有機會減息或降準，或有反彈機會。不過，就算反彈亦相信有限，就像上周五之無厘頭反彈原來是難得的沽貨機會。

全民炒股影響經濟

香港就話驚政治事件啫，滬綜指昨亦跌3.47%，收報4,887點，5,000點呢個大關升穿同跌穿一樣咁容易。股民跳樓事件對過熱的股市有冷卻作用，據稱現時有超過三成大學生正在炒股，營商和打工均無心工作，令固定資產投資和消費不升反跌，實在不能長此下去。用股市刺激經濟如果這麼簡單，日本就不會股市升至40,000點後又迷失20年。

此一時、彼一時是最佳寫照，昔日狂炒的半新股有些已從高位回落一半，中車A股（601766.SH）復牌後頻死火，但H股（01766）若跌破10元又不妨博吓反彈，話晒係起步位兼成交密集區。

高銀地產（00283）十一連陰，陰乾式下跌較高台跳水更具殺傷力。雖然睇住個升幅榜仍然件件燕瘦環肥引死人，但現時無論藍籌、國企、細價股均相當難玩。新股又如何呢？聯想控股（03396）現正招股，如果集團能像雲鋒基金一樣可以點石成金，相信唔使介紹都會瞓身認購。不過，睇番公司的策略投資，聯想集團（00992）及神州租車（00699）均是代表作，而聯想集團貢獻母公司盈利相當大，但其餘策略投資均是未受本港投資者認識及規模尚小，若能養大後在A股以高估值上市則另計。

華泰不濟隨時穿底

聯想控股是本港今年至今第三大IPO，僅次於HTSC（華泰證券）（06886）和廣發証券（01776），但兩隻券商股表現麻麻，後者昨創上市後新低，前者繼續險守招股價，若市況差下去料將穿底，而AH溢價擴闊至56%，炒溢價收窄只是一廂情願。

華泰最近有項好消息，率先將兩融規模提高至不超過2,000億元人仔，但華泰亦是率先收緊中車及創業板等槓桿率；提高兩融規模可能是為未來做好準備，到時A股被納入MSCI，滬綜指可能升上10,000點，兩融總規模增至2萬億人仔以上，真係愈講愈遠……

券商股現時全部見錢開眼，希望趁住呢次大牛市發圍，中信證券（06030）連環抽水，先係折讓43%配畀社保基金集資115億元，然後又折讓19%配畀雲峰等投資者集資270億元。雖然話新投資者個個係名牌，有新資金亦可多做生意，但折讓43%及19%喎！不能不計攤薄因素；現有股東相當唔抵，咁辛苦捱到咁高股價，但社保同雲鋒一句唔該就可低價攞貨。

趁市旺唔抽水就笨，現時炒股最重要有夢想和膽量，亦即市夢率和市膽率。阿里影業（01060）早前亦以每股2.9元集資120億元，股價低見3元後開始反彈。新諗頭係做TBO，顧名思義係中國版HBO，在電視上串流睇電影似乎是筆大生意。

阿里影業股東追夢

不過，內地消費者習慣免費睇視頻及機頂盒，而收費亦有芒果TV及其他競爭，阿里影業較可恃的是有「阿里爸爸」及內地愈來愈重視版權，但要達到普及估計亦要多年。

阿里影業市值807億元，內地去年電影票房近300億元人民幣，估計不出10年可超過2,000億元，直情威水過荷里活。不過，以每年三成增長速度計算是很大誤導，因為增長到某一程度就會放緩，就如網購近年增速更驚人，但阿里在美國的股價一直在80多美元之間浮沉。電影票房包括荷里活輸入、發行及院商分成、演員片酬、製作成本，拍戲不一定穩賺；有小股東明言買阿里影業是「買一個夢」，但這個夢可能很貴。

古勝