內地房地產發展其實真係走前香港好多，除咗有養老、綠色、旅遊地產等概念之外，嚟緊仲有上門睇症服務！當代置業（01107）尋日同喺美國上市嘅愛康國賓健康體檢管理集團簽戰略合作協議，當代置業嘅住戶未來將享有醫生上門「Body Check」、睇症、O2O健康監察等服務，不過當然要收費啦！
依家愛康集團外判醫療服務每月收約幾千元人民幣，之後同當代合作會收幾多錢？佢地話仲做緊調查同測試，今年內會有結果。
當代執董兼總裁張鵬話，首先推出服務嘅會係上海一個新樓盤，聚焦高消費力城市先，未來再逐步推廣至旗下所有樓盤。張鵬仲話，住戶可自由選擇服務類型，然後好似交管理費咁繳付。
對於長者嚟講，呢個上門診症服務真係唔錯，不過有幾多長者可以負擔到每月幾千蚊「居家養老費」，就要等服務推出至知喇！
余絲韻