六月份內地智能手機持續有新機出籠，除了大鬥功能外，最終還是要鬥平，多個新出品牌均針對小米機種，激爆劈價戰，其中奇虎360併購酷派（02369）嘅大神手機，併入雙方合資公司奇酷科技之後，日前剛推出大神兩款新款手機，開價分別為399元（人民幣‧下同）和499元，挑戰早前減價至499元嘅紅米2A。然而老闆周鴻禕可能會大嘆自己聰明一世，笨在一時，為何不將手機開價定為360元呢？
對於挑起減價戰，周總形容：「我不後悔降到399，如果後悔，就是沒有把價格做到360。大神對自己狠一點，就是對用戶好一點。」絲絲心諗，咁又係嘅，貴為內地互聯網防毒軟件一哥嘅奇虎360，周總如果將大神手機定價360元，咁咪大神和奇虎360齊收宣傳效果。
之不過，從小米和360兩者的銷售情況看，紅米2A宣布降價後，據說單日銷量超過30萬部。而大神的降價，又睇吓賣399和360，兩者銷量會相差幾遠？
內地手機減價戰已經白熱化，新手機售價唔使999，唔使899，唔使599，只需499，甚至399！最新加入劈價，同樣係針對小米而來嘅魅族旗下嘅魅藍Note 2昨開售，賣799元。
余絲韻