絲絲講場：金管局俄路演嚇餐懵
香港人民幣業務搞得有聲有色，成績有目共睹，背後一大功臣當然係經常為推廣香港四出奔走嘅金管局。唔覺唔覺，過去四年來金管局搞咗十二場海外路演，金管局同事總計飛越二十萬公里，足迹遍布四大洲，澳洲、俄羅斯、中東、歐洲、南美、北美去過晒，當中發生不少趣事。
差啲冇錢交場租
講起令人難忘嘅「苦事」，莫斯科嘅路演都算經典。當年莫斯科啱搞大型路演活動嘅場地唔多，金管局好不容易先訂到一間酒店嘅會議廳，但原來交場租嘅匯款因為俄羅斯假期匯唔到去酒店帳戶，酒店竟然要求畀現金，一時三刻邊得嚟咁多現金，嚇到同事們以為辛苦準備嘅路演會爛尾。好好彩，酒店喺最後一刻肯通融。
不過，險象接二連三，其中一位香港主講嘉賓嘅俄羅斯簽證突然話出咗問題嚟唔到，金管局惟有啟動Plan B，臨時拉伕請另一個講者補上。嗰次演講另一位主講嘉賓係俄羅斯副財長，但佢一直遲遲未出現，正當同事們苦惱緊如何開展Plan C時，副財長先至突然現身。
主講嘉賓遲大到
根據當地人士說法，莫斯科客人出席宴會遲到好平常，所以宴會一般都唔會準時開席，所以都只不過係虛驚一場啫。
不過計絲絲話，依家我哋做到人民幣業務龍頭大佬，咩都抵番晒啦！金管局一班同事都話，香港人民幣業務發展神速，海外推廣路演都發揮咗好大作用。
余絲韻