絲絲講場：俊和副主席欣「相」建築
上市公司參與藝術文化活動不時都有，但管理層真係落手創作就好少見。絲絲尋日喺藝術中心睇咗個攝影展，有啲相就係出自俊和發展（00711）副主席彭一邦（Derrick）之手。呢個「Connection連‧繫」慈善攝影展，展出Derrick同馬來西亞攝影師Ming Thein鏡頭下嘅俊和建築世界。Derrick話希望大家唔好將建築工人嘅辛勞「Take It For Granted（視為理所當然）」。
表揚修路污糟手
今次Derrick拎咗12幅相出嚟展覽，佢自己鍾意邊幅？就係影住IFC、文化中心同太空館頂部嗰幅，因為代表住香港唔同年代嘅經濟繁榮同文化進步；仲有另一幅捕捉工人維修馬路時嘅一刻，係佢有個星期日飲完茶影到嘅，佢希望借此表揚同感謝工人嘅默默付出。
Derrick用開乜機？今次展出嘅相大部分都係用細機影，佢話以前用開大機，依家老咗用細機多。依家只係40歲，正值壯年，仲未講得上個老字喎。
Derrick希望透過攝影展畀人了解地盤運作，「建築商除咗製造嘈音同塵埃外，其實對社會都貢獻良多。」展出作品會作慈善出售，每幅9,888元，部分會拍賣，捐贈建造業關懷基金同俊和旗下幫助病童嘅「護‧聯網Lifewire」。
余絲韻