內地巨富王健林嗰間萬達電商，佢哋個CEO董策上星期確認走人，行內傳萬達電商即刻高價800萬人仔年薪挖角，呢幾日傳，幾乎行內乜高管都收過獵頭電話或電郵，行內仲笑「邊位無被挖過，好打極有限」。
萬達電商早喺一二年就組建，呢三年來，公司嘅大新聞，除咗舊年宣布同騰訊百度聯手搞電子商務外，就係換CEO，三年走兩個。算唔算頻密？你話呢。
佢哋一二年底請咗做過阿里同Google嘅龔義濤過檔做首任CEO，之後仲大肆招兵買馬，當時傳除咗阿里馬雲同京東劉強東之外，又係乜人都挖過。
點知到舊年龔義濤選擇走人，由董策接棒；依家董策又走，話去澳洲照顧家人喎。究竟乜事？聽講龔義濤離職後呻過，話公司事無大小都要用PowerPoint向領導請示匯報，領導批准先做得。企管文化傳統成咁，流住互聯網血嗰啲大佬，就算用舊天價年薪遮住自己對眼，睇嚟大概極限都只係頂到一年左右。
話時話，龔義濤講嗰位「領導」，會唔會就係王健林呢？又不如，今次乾脆畀王公子思聰出馬做CEO吧！
余絲韻