絲絲講場：雷軍自誇小米係藝術品
有四隻字，係小米雷軍心目中可能難聽過粗口，就係「物美價廉」。前日雷軍喺小米發布會，話之前有人同佢講小米「物美價廉」，點知雷軍一聽到就嬲嬲豬，因為佢覺得「物美價廉」係鬧人喎。雷軍仲話，創辦小米就係想改變中國產品「畀人Low」嘅印象，仲話小米嘅產品係世界藝術品，好似新嘅小米Router就係「安靜的美男子」咁囉。
彈對家遙控太多掣
對雷軍嚟講，乜嘢為之Low？就係Sony同三星嘅電視遙控。點Low法？太多掣喎。雷軍話電視遙控幾個掣就夠啦，仲話咁多掣就連自己「英語不好但理工科超強的人」都唔識玩喎，踩人之餘都不忘自讚。
話時話，雷總開口埋口都喺講藝術，其實係咪想將小米定番個藝術品級數嘅價錢先？
余絲韻