Market Insight：晟德買澳優有後着

古勝上討論區，睇見到有網友開post套用影帝張家輝金句：「依家無，將來一定會有。」去睇今次新沙士，即新沙士疫情會在香港擴散，皆因想博當年沙士一疫歷史重演，等高企不下的樓價有插水機會，等無殼族可以圓置業夢。香港樓價高到有人竟然希望靠天災人禍上車，應該都算係世界奇聞。

中港股市持續背馳

你問我，疫情去到當年沙士般大規模在社區爆發，樓價會唔會跌，答案係肯定的。不過，部分人可能對十幾年前發生的事有點模糊，誤會當年香港樓價高位狂插七成，最終導致大量負資產出現完全係沙士「功勞」。事實上，○三年疫情不過係送香港經濟同樓市最後一程，真正令樓市崩潰的係亞洲金融風暴。

回顧○三年沙士疫症爆發，樓價由年初多跌11%之後，隨着疫情過去，個人遊等措施開通，經濟逐漸復甦，年底時樓價經已升凸。在下向來個性樂天，回望人類歷史上經歷過大大小小疫情災禍，最後都大步欖過。今時今日醫學昌明，沙士後通報機制及防疫意識都比以往嚴謹，只要做好個人衞生本分，疫症最終都會遠離我們而去。

旺旺頻回購唔怕跟

近排港股與A股背馳情況持續，死都唔肯跟升，開始有大股東增持及公司回購消息變得頻繁。昨日最搶眼肯定係介紹分拆上市無耐的長實地產（01113），超人增持消息刺激股價升3.7%收報68.05元，成為升幅最大藍籌。另外，中國旺旺（00151）亦有回購行動。

翻查年初至今，旺旺經已進行過十二次回購，由年初8.45元買到近日的8.01至8.12元，今浪回購頻率比一三同一四年的兩輪都要高，有大行估公司今年業績可見底回升。睇番一五年預期市盈率17倍，仍貼住近年估值下限，到底完全唔跟大市走的內需股，會唔會喺下半年食番個尾胡？由回購的舉動，睇嚟8元水平輸面唔大，應該唔會死錯人。

北京對樓市調控態度一百八十度轉變，近日傳「限外令」取消，有機會在全國實施，意味着樓市全面歡迎境外資金幫手掃樓，尤其阿爺要頂住庫存高企的二三四線城市樓價，免得樓價大瀉加添經濟放緩壓力。

回顧四、五月內地樓市數據，有迹象無論價量都已經見到低位反彈之勢，之不過，內房股早於三月偷步升咗唔少，形成近日銷售數據再好，市場興奮程度都打咗折扣，反而見有好消息出貨情況。

進取內房股難大升

有賓架認為，早排恒大地產（03333）事先張揚的批股要錢，初期市場冷淡，最後不惜用跳樓價，減完再減都要批，反映較進取的發展商，融資及套現壓力唔細，若非有更大的刺激政策出台，短線內房股要返回五月初的高位並唔容易。

澳優（01717）賣枱，股價昨升4.7%收報3.08元。去年公司獲台灣晟德大藥廠購入25.84%舊股，成為最大股東後，昨宣布再向九間機構組成的聯席要約方，額外購入20%股權，每股作價3.01元涉及5.94億元，超過全面要約觸發點關係，依例向其他街外股東，以同價3.01元提出全購要約。晟德的交易，也成為台灣企業來港收購上市公司的首例。

澳優從事嬰幼兒配方奶粉，晟德則經營嬰兒、小童及長者及特殊護理病人使用的口服液藥物及配方藥。乍看交易，真係唔知係晟德認為同外國品牌鬥生鬥死的嬰幼兒奶粉生意有可為，抑或想借澳優的分銷網絡擴展本身產品在中國的銷售。

在下搵到段台灣報道，高管指收購是晟德的十年擴張計劃第一步，準備未來併購至少五個歐美特殊營食品公司，再將產品銷往中國市場。有3.01元的保護傘撐住，短期股價應不成問題，但以一間市值30億元，本身奶粉經營生意只係普普通通，去年僅賺9,021萬元人仔，差不多26.5倍PE或2.62倍市帳率，實在已搞唔清到底係依家殼價貴咗，還是晟德對澳優信心十足，抑或交易後有其他盤算？

古勝