股神巴菲特去過中國四次「獵食」搵投資項目，最早嗰次係九五年，係佢Friend兼微軟創辦人蓋茨帶隊。不過，雖然中國經濟令巴菲特驚艷，但中菜佢唔啱胃口，訪華好幾次，佢半啖中菜無嘗過。
巴菲特雖然今年已84歲，飲食習慣同細路無分別，至鍾意美式「垃圾食物」。
不過，佢喺中國一啲都唔擔憂無啖好食，事關訪華大隊內有位至叻整漢堡包同炸薯條嘅大廚。有次佢登上長城，係上面等住佢嘅，就係佢最心愛嘅櫻桃味可樂。唔通係蓋茨嘅貼心安排？
其實，巴菲特喺內地好多人捧，今年慈善午餐中標嘅正係一間A股公司天神娛樂，雖然中標價234.5678萬美元被指「玩嘢」，但巴菲特話過往慈善午餐從未有過不快經驗，話好期待同呢間天神娛樂高層見面。
余絲韻