絲絲講場：淘寶夠驚喜 收貨有餡？
Amazon同阿里巴巴有乜分別？阿里主席馬雲話，Amazon係商場，睇到乜買乜就係乜；阿里就唔同，淘寶買返嚟可能同張相唔同樣，啲人買到驚喜。馬雲仲話喺美國，網購就係網購；但喺內地，呢個就已經係一種生活方式，仲係年青人識得享受嘅嗰種，就好似去Starbucks嘆咖啡咁喎。
淘寶嘅驚喜，有時真係估唔到。話說有人淘完寶，新年收貨時，包包內多咗封利是。拆開有驚喜，事關利是有餡，係張韓圜銀紙，仲有好幾個零添！咪住，張銀紙寫住係北韓嘅？仲唔知係真定係假嘅添！以上，係真人真事，收到呢個驚喜嘅，就係絲絲。
網上「第三次世界大戰」
講番馬雲，佢上述一番話，係嚟自呢兩日佢喺紐約經濟俱樂部嘅演講，佢用自嘲嚟讚番自己，已經達到藝術境界。
佢出名Talk得，好似演講開場無耐就嚟句「第三次世界大戰打到嚟」，跟手佢就話，唔係國與國之間開戰，只不過係話透過互聯網，中、美等一齊聯手對抗疾病、貧窮呀咁喎。
馬雲仲話，若果「人生有Take 2」，佢唔會畀阿里上市，事關煩。梗係，啲美國股東同獨立董事嘅嚴厲法，靠Talk應該Talk唔走。
余絲韻