絲絲講場：「盲摸摸」炒股勁賺百萬

主人翁係一位北京嘅失明按摩師劉師傅，佢齋炒嘅「神股」係乜？係交行。

以為交行搞「交通」

劉師傅用咗27萬（人民幣‧下同）本金，借到45萬入市。最初4.5蚊入，最簡單嘅低揸高沽出出入入咁，到家陣淨賺102萬！

佢點解揀交行呢隻「神股」？理由仲「神」。話說佢有位熟客係證券行做營業部經理，阿經理教路話若借錢炒股，就先要保本，最好揀銀行股。於是劉師傅自己就諗：咁多隻銀行股中，就交行啦，貪「交通」有埋「一帶一路」概念喎。結果，咁都得。

盲椿椿入市？又唔可以咁講，事關劉師傅睇嚟又好似心水幾清，佢有自己一套炒股套路：就係交易絕對唔使頻密，唔到心水價唔郁手，每次全部錢買晒或全部股沽晒，而且只對交行一條心。

就算四月創業板癲升時，佢都寧願空倉成個月等交行啱價先入。劉師傅自訂嘅炒股規律，最後一條係工作第一，即係絕對唔會辭工去炒股。

阿婆夠耐性贏29倍

今年78歲嘅孫婆婆，佢就靠睇央視嘅「新聞聯播」跟國策炒，2萬人仔股本，炒到變今時嘅60萬，雖然係用咗20年。快牛好，慢牛好，最緊要係賺到錢。

余絲韻