Market Insight：高息股防守力強

當知道結果，古勝真係鬆一口氣，事實買股票向來係賭未來美好願景，一旦成真乜幻想都無晒，好多時反而是出貨時機。老實講，就算真係即刻畀A股加入MSCI，至叻都係未來一年，吸引到170億至200億美元流入A股市場。

睇番近兩日內地滬深兩市成交無上星期咁癲，但講緊兩市成交由歷史高位2.3萬億元人仔落返到1.8萬億元人仔，少說都2,900億美金。以A股一日四小時交易，納A股入MSCI引入外資，初期仲未及刻下殺紅了眼的大媽在賭枱上晒冷玩17分鐘。A股唔入住，反而炒鬼仲可以搵藉口繼續發住白日夢以為有運行。

近期外圍驚緊美國聯儲局加息，歐美股市跌到七個一皮，QE下德股已由高位跌超過一成。A股反地心吸力，純粹係股民見經濟數據愈差，對中央托經濟愈出力預期愈高所致。

人幣企硬有苦自知

早兩日內地公布的五月進出口數據，出口跌2.8%，但更得人驚係進口急跌18.1%，可見內地唔單止出口製造業大大鑊，本身內需亦弱過藥煲。幾位內地出口企業高管，不約而同話早排減息對佢哋民企幫助唔大，一來阿爺今年要做好地方債置換，加埋一大批振興計劃要地方政府交數，融資吃緊情況未改，銀行有錢都唔願向被視為高風險的出口企業行個方便。

出口疲弱主因，古勝認為係歐日推量寬，亞洲貨幣統統鬥跌得多的環境下，人民幣匯價企硬不特止，因為美元大半年來升值，同美金掛鈎下，人仔變相兌美元以外貨幣大升值，出口競爭力再打個折扣，形成出口企業想谷都谷唔起情況。

作半年的沙盤推演，中國死唔肯加入貶值，一來投鼠忌器，近月外匯儲備流出情況日益明顯，加入貶值隨時令外資流出得更快，而且人民幣國際化進入重要時刻，為進身儲備貨幣，中國博人民幣加入IMF認可的SDR（特別提款權），實在望到流晒口水。十月IMF新一輪審批前，人民幣維穩動機相當大。近排匯價猶如點穴一樣，睇怕SDR有着落前，中國難免顧此失彼，透過貶值搞好出口的空間有限。

破位增添大堆蟹民

疑似首宗港人新沙士感染消息，將港股逼出持續兩個月的高位橫行方塊，恒指昨跌301點收26,687點，跌穿四月九日放行公募基金買港股，二千九億成交升市的即市低位26,732點，意味中環多了一大堆打橫行的投資者。魚缸八卦之士無不輕嘆，估唔到《大時代》臨播結局，才是股市宿殺之時，喪炒的二三線股唔少都一連兩日山泥傾瀉。

領匯（00823）三月底止年度，可分派收入41.92億元升9.5%，每基金單位末期分派0.9328元，連同中期分派0.8956元，全年每單位派1.8284元，高出平均預期約1%，以收市價45.15元計，息率4.04厘。

去年，領匯完成四個資產提升項目，包括海富商場、美林商場、元州商場及H.A.N.D.S，綜合續租租金調整率22%，零售租金按年增長7.2%，租用率維持穩定的94.8%，反映內地遊客減弱，旺區舖租回落對主攻屋邨商場的領匯影響有限。

長線收息依然穩陣

近日電能實業（00006）向卡塔爾主權基金出售港燈（02638）16.53%股份，揣測長和系開始出脫有yield項目（穩定息率回報）的動機。近日環球債商對美國加息預期升溫，引發債市逃亡潮，長期利率回升。回顧美國退市就像狼來了故事一樣，近幾年常被興風作浪，好似一三年下半年至一四年初，美息回升預期升溫，十年期美債息由1.6厘升至3厘水平，領匯單位價格由43元跌到近30.7元，差不多要4.4厘水平才企穩。

近日美債息升至2.48厘，如果套用1.4厘溢價，刻下領匯估值合理，問題是今浪美債息升勢未止，45元附近的領匯企唔企得住，關鍵還要看市場對美息預期的微妙變化，但如非短炒純為長線收息，4厘樓上領匯是不錯選擇。

古勝