內地股市熱爆，係人都知，有幾爆？內地股市過去短短一年市值暴增咗6.5萬億美元（即50.7萬億港元），即是呢舊錢夠買起全球市值最高嘅蘋果公司（Apple Inc.），唔係一間，係八間有找；又或者換晒做100蚊美鈔，可以圍繞地球250圈。
史上從未有個股市，能夠喺短短一年內市值暴增到咁，但經濟卻陷入九○年以來最薄弱嘅增長。即係？
即係家陣有個「完美泡沫」喺面前咁囉，荷合金融市場研究部主管Michael Every係咁講，佢話太多人極速賺到極多錢，搞到個個驚執輸飛身撲入市，成個市場瀰漫住個「貪」字。
佢仲話，短錢梗喺賺到，不過恐怕下場會好慘。即是打回原形只係時間問題囉。
不過，安本資本管理中國及香港股票主管姚鴻耀就覺得，只要中國政府容忍，內地股市再升多啲都仲得喎！咁即係點？你話呢。
余絲韻