絲絲講場：洪丕正：我係條三文魚
渣打銀行大中華地區CEO洪丕正（Ben）尋日係加拿大話，自己其實係條三文魚，九十年代由加拿大逆流游去大中華。
三文魚最特別之處係逆流而上，呢個常識大家應該知啩。話說阿Ben係喺多倫多大學讀碩士，畢業之後就留喺加拿大做嘢。
離開加國 逆流上大中華
直到九二年，雖然當時中國仲未咁開放，但阿Ben好睇好大中華，覺得未來有好大發展空間，於是決定離開個Comfort Zone，千里迢迢「游」返香港，加入咗渣打。結果？依家渣打大中華區嘅一哥，就係佢。
阿Ben呢幾日去多倫多出席貿發局論壇，直頭好似返咗家鄉咁，同啲嘉賓大講當年讀書時嘅冰上曲棍球名星，又推介絲絲一定要去尼加拉瓜大瀑布。話時話，今時今日游返嚟加拿大嘅，點只係一條三文魚咁簡單。
余絲韻