股評人唱功肯定要有，唱好唱淡股份外，估唔到唱歌亦一樣得。君陽證券CEO鄧聲興（Kenny）原來真身係「鄧Sing興」，絕對係「K迷」一個，平時Weekend鍾意唱K，佢啲K友包括金利豐（01031）研究部執行董事黃德几（Dickie）同做過港姐嘅朱凱婷。
唔通好唱得？點知「鄧Sing興」忽然謙，話黃德几先係唱得嗰位，仲爆咗Dickie原來有個朵叫「財經界黎明」！「四大天王」之一嘅黎明！講緊個樣、把聲、定唱功呢？「鄧Sing興」話三樣都似。
咁啱尋日「鄧Sing興」做CEO嘅君陽證券開幕，黃德几都有去捧場。場內舞住獅切住燒豬之時，絲絲趁機話聲黃得几知，佢畀K友「唱」佢好唱得，「梗係！」佢答得幾咁爽快幾咁鏗鏘，原來阿「財經界黎明」以前參加過全球華人新秀歌唱比賽，好似係九六年多倫多。收到，失覺晒。
「鄧Sing興」自己又鍾意唱乜？原來係連詩雅同張敬軒嘅歌，嗱不過講到至愛，竟然係薛凱琪（Fiona），唔單止由Fiona出道至今隻隻碟買齊，仲話首首歌都咁好聽。喜歡成咁，原來佢哋做過鄰居喎。
想知「鄧Sing興」同「財經界黎明」平時去開邊個場？想撞吓佢哋？貼士係銅鑼灣。
余絲韻