孖妹S檔案：專訪17歲小股神 兩年翻兩番

BF：加拿大少年股神 Brandon Fleisher

（目及）實盤數揀成長股

Kitty：你投資經驗只得十九個月，但已將資金由5萬加元變成18萬加元。用港幣計，你一早進身百萬富豪行列！

Brandon認為投資前必須做功課，所以每日會花數小時搜集資料及分析股票。	父親節將至，Brandon表示有意為父親Danny（右）炮製特別驚喜。	少年股神知多啲

BF：我今年首五個月嘅賺幅都達到50%，希望今年底可以將資金變成20萬加元或以上，即係比起步資金增加最少3倍。我專吼細價股，因為佢哋規模細、基數低，業績同股價都容易增長，唔需要好似大價股咁，靠板塊升勢帶動。

少年股神投資組合	Inuvo近月升至高位	時代華納走勢上揚

彩兒：你初學投資就買細價股咁高風險？

BF：我唔覺得買細價股係高風險，因為事前都需要大量資料搜集，每日都花幾個鐘時間睇財經新聞、睇上市公司財務報表及資產負債表，見到唔識嘅術語就用Google查，邊買邊學。雖然我實戰經驗唔多，但我早喺四年前已追蹤美股表現。

以市盈市帳作準則

Kitty：我知吖。你第一次接觸股票，係因為當時嘅數學老師叫你哋每人揀隻股票觀察，而你揀嘅細價股竟然即季創新高。之後你喺虛擬交易平台上嘅回報仲唔錯，成功說服父母提供5萬加元起步資金。你眼光咁獨到，唔知仲以為你有內幕消息。

BF：我純粹用基本分析揀成長股，以良好市盈率或市帳率、低派息率甚至無派息，以及擁有充足現金或資產作為揀股準則。現時持有四隻股票，即係Marchex（MCHX）、Inuvo（INUV）、Lumber Liquidators（LL）及時代華納（TWX）。我持股未多過一年，通常幾個月就沽。

下一站向港股埋手

彩兒：你呢套短炒策略喺邊度學番嚟o架？

BF：彼得•林治（Peter Lynch）係我最欣賞嘅基金經理，佢嘅「成長投資法」係我投資策略嘅基礎，尤其係佢本書《One Up On Wall Street》，教人點搵投資靈感同分析股票。不過，我都會融合股神巴菲特嘅價值投資法嚟發掘價值股，所以我係運用緊「價值成長投資法」。

Kitty：呢期中港股市搶晒風頭，個別細價股累升幾倍，識炒梗係炒呢啲！

BF：我都有聽聞近年中國股市升得好癲，不過我淨係專心買美股，A股市場就唔多熟悉。

「滬港通」通車的確係大事，亦勾起我對中港股市嘅興趣，但我會先考慮向港股埋手，因為大家都話香港市場增長迅速。可能明年就會開始搜集相關資料。

避開半新股波動期

彩兒：近年有唔少中資股喺美國掛牌，最矚目嘅梗係去年九月IPO嘅阿里巴巴（BABA）。唔知佢係咪你杯茶？

BF：其實我主張避開半新股，因為新股上市初期較波動，好難預計會發生咩事。我至少會等一年半，睇晒公司上市後六個季績先考慮投資。

不過千祈唔好誤會，我唔係專登要避開中資股，所有喺美國掛牌嘅增長股我都會作考慮，例如半個月前，我就買咗中資奶粉股聖元國際（SYUT）。

成功＝做功課＋信自己

彩兒：投資幾叻都好，落到場少不免要交吓學費，不如分享吓你最驚險嘅一次啦。

BF：我當然都有輸過錢，但更多的時係，因為我見到有更好投資機會，所以唔介意蝕住走，方便調動資金。講到最驚險，就係試過隻股票喺我買入第二日就大跌12%，但翻查公司業績時，見到佢收入跌而盈利升，我相信係好事，所以決定喺低位再加碼一倍，結果幾個月後我轉賺30%。

我從來都好相信自己嘅眼光。永遠都有人認同或反對你嘅投資決定，但無可能要所有人認同先行動。呢個亦係我對投資新手嘅建議： 做功課，然後信數字、信自己。

Kitty：市場關注牛市多年嘅美股有機會大跌，特別今年應係加息年。到時啲細價股跌幅可能仲驚人呀！

BF：我當然唔希望短期內會冧市，但任何時候都會做好最壞打算，揀股時會從多方面考慮，有信心隻股票喺股災期間唔會破產、有足夠現金同資產捱過股災，以及股災後有能力跟隨經濟復甦，咁先會買。我相信，我目前手上嘅股份全部都過關。

經營網站解答疑難

彩兒：今年九月你就會入大學修讀商科，係咪為日後走入商界鋪路？

BF：我真係好鍾意投資，想將佢變成終身事業，希望日後可以成立同管理自己嘅對沖基金。我成立咗個人投資網站The Financial Bulls，並會定期為訂閱的讀者撰寫通訊（Newsletter），希望長期經營，幫有需要嘅新手解答疑難、提供免費投資資訊。

年輕人應該盡早投資，咁先可以令財富累積得更多更快。如果有日我嘅投資組合去到100萬加元會點？其實都唔會改變啲乜，我會繼續投資、繼續滾大舊錢。

Kitty：同少年股神傾完計，覺得自己心境都後生咗！原來Brandon未嚟過香港，姊妹快啲認住佢個樣，如果有日喺街見到佢，不妨打個招呼。重點係：佢未有女朋友！

高妹、彩兒

若有料報畀高妹同彩兒或有嘢問，可電郵money.biz@opg.com.hk