絲絲講場：做科網巨頭 細時有樣睇

馬雲駁嘴練英文

阿里巴巴主席馬雲細細個已經鍾意睇武俠小說，最想做《笑傲江湖》個風清揚，逃學打交同樣咁叻，成績差就梗，唯獨是英文特別好！皆因佢蝦阿爸唔識英文，阿爸開口鬧，佢就用英文還拖，嘴愈駁愈過癮，英文就愈學愈起勁。

騰訊CEO馬化騰細時唔多出聲只迷戀天文，小學四年級就自己落手整望遠鏡，夢想成為天文學家。唔知好彩定唔好彩，老師話佢知，讀天文嘅多數都係做地理老師，就係咁，佢轉軚去接觸電腦。

李彥宏迷上唱戲

百度CEO李彥宏多得阿爸成日帶佢睇戲曲，結果就迷上，時常搵床單包喺身唱戲，仲因為生得「白裏透紅，水靈得很」，山西一個劇團一見立即取錄。不過之後，李彥宏見家姐做咗大學生後，得好多人羨慕，佢又於是立志考大學，結果入咗北大。

京東CEO劉強東細個何止無奶茶飲，食都無啖好食，皆因佢生長於江蘇最窮嘅地方，屋企曾經窮到連續幾年日日餐餐都只係得紅薯同粟米。

聯想名譽主席柳傳志少時超Like《水滸傳》同《三國》，睇到直頭識背咁滯，令到柳傳志最傷感嘅人物就係諸葛亮，覺得佢「學富五車但落得個淒涼下場」咁話。

余絲韻