絲絲講場：兒童節 大媽親子蒲魚缸
尋日內地六一兒童節，A股大時代下，最In嘅親子活動就係一齊去證券行炒股？唔通，內地啲阿爸阿媽真係咁想仔女自細去感受吓證券行股炒氣，真係幼承庭訓成咁？
內地股民最細得15歲？
其實，唔使阿爸阿媽教路，內地唔少90後已經加入炒股大軍。內地有財經網站上個月訪問咗4千幾個股民，近6成半係90後，當中42%係90至93年出世。嗱，仲有1.3%嘅話自己係00後。00後？即是今年得15歲！1.3%就即是有成52個。
不過，得10.5%股民係聽阿爸阿媽或老股民教路，42.2%就話靠自己睇書同網上學。內地之前仲流傳有個90後靠前人經驗研究咗套「獨門方法」，結果4年內賺咗1.5億人仔。
港少見股友帶B落行
咁香港啲證券行又畀唔畀帶B炒股嘅呢？致富證券投資銷售部董事郭家安話，雖然香港證券行唔係「18禁」，不過家長帶B或者小朋友一齊炒股嘅情況就少見啲，兩、三年前試過喺暑假有客帶幾歲大嘅小朋友落行，佢又嘈喧巴閉，又周圍走，搞到其他客詐晒型，分行同事惟有勸佢以後唔好帶啦。炒股係要專心盯實嘛，你懂的。
余絲韻