Market Insight：食品股接力炒上

昨日滬綜指收報4,941點，升30點或0.6%，兩市成交2.15萬億元人仔，相當於2.69萬億港元，足足是昨日本港主板1,575億元成交的17倍。雖然內地近排狂出口術，一陣放寬公募基金經港股通入市，一陣又加速兩地基金互認，望為北水排一排洪，流多少落港股搞旺互通門戶。不過，大媽見A股市場久旱逢甘露，七年來首見癲市，人人搵錢至上，又邊個肯轉飯鑊落嚟做開荒牛。

君可見昨日港股通花掉近14億人仔配額，經已係近排至巴閉紀錄，但同內地魚缸交易量比，只係黃牛頭上一條汗毛。由樂觀角度，近期即使唔少二三線莊家股藉大媽入市傳言炒到出煙，一兩個星期內股價倍計飆升的比比皆是，但對比A股而言，未有耐配得上個癲字。

古勝冇點你2015/05/28

贏三成半

芬佬未肯同大媽癲

不過，港股死都唔肯跟升，外資芬佬猶如就算用槍指住個頭都唔信港股會升到A股咁癲，形成暴動股有暴動股炒，指數就玩拉牛上樹，萬一A股出現三幾百點回吐，你話港股可以完全置身事外，睇怕都幾難。風高浪急下，入市前最好計一計可承受幾大損失，訂好止蝕，總之個市一回就食胡離場，唔好諗住在這市況中同股票談戀愛。

隔晚聯儲局主席耶倫講到明今年內加息在所難免，華爾街三大指數腳軟，港股唔跟A股行，指數開低後全日逐少試底，午市後破一破兩萬八，最後拗腰收28,081點。期指結算前夕，好友大戶力托的意圖明顯，六月期指日市收27,840點，表面低水241點，但扣除六月藍籌除息因素，實際高水近百點。千祈咪會錯意以為大戶睇淡六月，由五轉六月倉要額外畀多近110點溢價，可見期指大戶以好倉客多兩錢肉緊，短期唔能夠睇得太淡。

消費板塊鑊氣蔓延

消息股方面，紫金礦業（02899）批A股集資100億元人仔，昨股價急升16.3%報收3.48元，紫金A股（601899.SH）收5.76元人仔，差不多7.2元港紙。同內地股民要錢，相信揸H股的心理上當然着數些少。近期由0.9元起步炒到上2.6元的米蘭站（01150），大股東向第三方批售1.12億股，賣完仲保留3.75億股。

昨十一點半左右米蘭站股價開始山泥傾瀉，最後急挫46%收1.22元，即使無披露交易作價，但邊個最有斬獲唔使畫公仔畫出腸。今時今日內地客使錢愈見縮皮，加埋一簽多行玩完同埋內地六月起調低關稅，除賣枱外，實在無理由支持接火棒，但偏偏昨日見插到1.5元樓下，唔少散字派衝入，股市膽生毛之輩唔少，可見一斑。

內地統計話首四個月內地股民獲利1.4萬億元人仔，炒股隨時好過打工。搵到錢自然手頭鬆，早排已講過非必要性消費，好似百貨、白酒股應有一炒條件，當日推介銀基（00886），一個月唔到已升近八成。近日所見，呢個故事有延伸到其他生活消費品身上，昨日果汁、乳業、奶粉及副食品股統統見有捧場客，炒味夠交投較有瞄頭的，有海升（00359）、匯源（01886）、統一（00220）、雅士利（01230）同阜豐（00546）等。

康師傅業績料見底

即食麵一哥康師傅（00322），啱啱出業績表現麻麻，首季少賺16.6%，營業額亦跌16.5%至23.2億美元，兩大主營業務包括飲品及即食麵，收入按年跌18.9%及13%。股價反而有大成交配合，由52周低抽升6.6%收報17元。講到底，內地即食麵減價搶市場的戰役有緩和迹象，康師傅按年收益仲未止跌，但同去年第四季比，已大幅回升17.7%之多，似乎最壞時刻已過。

古勝之前講過，低通脹低原材料價對幾隻食品股都有利，只係今浪碰上整體消費市道唔好，加埋減價促銷拖累，銷售額向下先無人咁掂佢哋。

睇番康師傅首季即食麵及整體毛利率都有改善，首季業績有見底迹象，一五年PE 24.9倍，在○八年以來20至39倍的區域中下限，股價應見了中長期低位，假如未來返回中位數估值附近，現價仲有18.5%升幅，見番20元應該唔難。

古勝