Market Insight：不能錯過的戰略布局

雖然深港通未有影，但好友不致於中空寶，兩地證監會聯袂宣布兩地基金互認，初始額度各3,000億元人仔。消息一出，夜期挾升221點，攻破28,200點。

港股自四月底高見28,588點後，最深回到27,200點水平，花了近一個月時間高位橫行，完全無理會A股屢次改寫七年高位，今次臨結算前跟A股破關，同期指客趁現貨成交縮返到千二、三億元，容易控制到高位結算不無關係。本周四期指結算前，相信再破28,588點的可能性都幾大。

古勝冇點你

累升六成

為人仔國際化提速

今次兩地基金互認消息來得幾突然，阿爺加速人民幣國際化，資本帳開放的進程，實在畫公仔畫到出腸，估計最近同IMF研究畀唔畀人民幣加入SDR，A股可唔可以年中加入MSCI，有着不可分割關係。

由滬港通開車之初，AH股幾乎平水，到今日A股反而貴H股近兩成九，AH差價因滬港通而收窄的公眾共識並無出現，反而A股的暴炒文化就率先入侵魚缸。

今次基金互認，到底邊一面投資者會對隔山買牛的意欲較大，在今日反智事件充斥下，實在無謂諗咁多，本地基金公司惠理（00806）在互認消息一出，老闆隨即宣布配售9,600萬股舊股，最多套現15.69億元。最先受惠於消息，反應最快有真銀落袋，佢認第二，恐怕無人敢認第一也。

中銀香港（02388）放售南洋商業銀行進入最後階段，上周五股價再升8.1%收報33.15元，創上市十二年新高。分析員向高管了解，似乎中銀套現近400億元後，未必會派特別股息，轉而向母公司中行（03988）收購東盟地區業務，有機會發展成跨地區銀行。加埋兩地基金互認，中銀又係受惠者之一，一心等賣資產派彩的股東，今次可能有意外驚喜。

雖然有「一帶一路」、「互聯網+」以及亞投行等一大堆炒作材料，惟經濟未見起色前，成個市仲係抱住信阿爺不如信「雙馬」的態度入市。互聯網新經濟概念仲係最啱炒家胃口，阿里系今年先後為阿里影業（01060）及阿里健康（00241）點石成金，兩間公司轉型十畫得一兩撇，市值經已數百億甚至上千億，銀泰（01833）會唔會一如傳聞改名阿里商業唔太緊要，喺兩個月唔到，已由5元起步翻了近三番，最高去到17.24元。

阿里系炒法勝一籌

最近阿里系炒法有升級到2.0的迹象，經已唔使入股，更唔使成間鯨吞。上周百麗國際（01880）同天貓簽署戰略合作協議，股價狂升12.6%報11.16元。一單消息令藍籌都當成二三線咁炒，實在同朱小華年代的光大系玩法已經沒有兩樣。

反觀騰訊（00700）系炒得有點低調，好似今年三月，同鴻海及和諧汽車（03836）合作發展電動車，簽訂「互聯網+智能電動車」的戰略合作，和諧汽車股價無爆升不特止，反而於7.2元見頂後炒返轉頭，花了近兩星期時間整固，先開始級級上，到五月初見10.44元高位。

上周和諧汽車批股集資21.4億元，以配合新能源汽車發展，配股價8.18元，股價上周五最低見過8.66元，即市並未出現較貼近配股價的情況，最後收8.91元跌6.3%，反映接貨者都不似短癮之輩。

和諧汽車值得憧憬

雖然折讓頗大，但認咗頭隨即掟貨食胡的並非主流，翻查數字，和諧包括大股東、鴻海及LC基金合共揸住七成股份，經過今次批股多咗街貨流通，對這隻貨乾股反而是好事。事實上，這間專攻汽車銷售，包括協助Tesla提供內地售後服務的公司，估值唔高，未批股前往績PE為13.7倍，過去幾年業績有聲有色，盈利由一二年的3.5億元人仔，到過去兩年的4.04億及5.44億元人仔，喺沾到「雙馬」概念的股份中算係比較平易近人的一隻。批完股可以咁硬淨，並非無因，守住8.5至9元消化一輪，可以睇到佢實，不排除會成為另一隻比亞迪（01211）。

古勝