尋日趁住520（諧音：我愛你）呢個特別日子，阿里巴巴主席馬雲當眾「示愛」！話說阿里首屆「全球女性創業者大會」尋日舉辦，顧名思義就請咗好多女強人嚟做分享，台下聽眾又多數係女性，名副其實女人墟，好識時務嘅馬雲就以「阿里成功秘方就係女人」嚟冧大家！
唯一嘅男嘉賓馬雲喺大會上致詞，話日前喺韓國一個論壇上不停畀人追問阿里成功嘅秘訣，佢話自己諗咗好耐，總結咗三個要素：阿里成功嘅秘方就係「女人、年輕人同小企業」。佢仲強調女人呢點，話今日阿里員工有49%係女人，而高管中有34%都係女人，有CEO、COO同CFO等等。當然更重要嘅係阿里絕大多數買家都係女性，所以講阿里靠女人發達都唔過分呀！
馬雲一番女人偉論後，就由阿里關聯公司螞蟻金服CEO彭蕾接力，佢提到自己睇過一本書叫做《未來是濕的》，覺得呢句話背後是講未來係屬於女人嘅，因為有女人嘅地方才不會乾巴巴，不是乾巴巴嘅地方才是濕潤的。最後，佢仲勸喻各位姊妹，面對過去要客觀理性；對未來則要非常感性同好奇咁話。
余絲韻