絲絲講場：小加為LME秘製 密實紅磨坊
LME（倫敦金屬交易所）尋晚喺會展搞咗個LME Black Tie Dinner，原來呢個晚宴係LME以往多年嘅傳統，作為LME母公司嘅港交所（00388），行政總裁李小加自然係以主人家嘅身份主持呢個晚宴啦！而小加尋日就打了個黑色煲呔出席。
股旺有錢請外援
香港LME晚宴今年係第三年舉行，絲絲有幸參與盛會，晚宴以法國紅磨坊為背景，背後係有特別原因，原來LME嘅交易員好鍾意紅磨坊，好享受紅磨坊裏頭嘅娛樂消閒咁話。港交所入鄉隨俗，於是昨晚晚宴就特地以法國紅磨坊背景布置，仲請來女藝人表演助興，好讓平時工作緊張嘅交易員，以至來賓都齊齊輕鬆一吓，大家癲番一晚！
不過小加講笑咁話，佢今次就唔會表演。去年因為無錢搞到佢自己要粉墨登場，今年有錢了（股市狂牛帶挈），所以可以請專業人士來表演，好大口氣喎！
1600嘉賓 每枱賣幾千鎊
講到法國紅磨坊，最著名自然係招牌嘅肯肯舞（Cancan Dance），呢隻舞喺法國當地係以無上裝表演嘅，但喺香港尺度自然唔得，絲絲聽聞港交所內部「電檢處」查得好嚴，所以表演嘅女舞蹈員都着得好保守。
今年LME Black Tie Dinner成績好理想，共筵開130席，總數1,600位來賓，多過去年125席。聽講今次晚宴真係一席難求，好似話每席枱賣飛都要成幾千英鎊，但睇番昨晚表演應該值回票價啦。
余絲韻