Market Insight：華新能潛在升幅大

中國以世界工廠自居，但製造業得半條人命，總理李克強又打出王牌，發布《中國製造2025》規劃全文。簡單講，要將低廉成本致勝的製造業，模仿德國式的高端「智慧製造」。得唔得，恐怕無三幾年都未見到成果。諷刺係，啱啱有網上新聞話中國有人將薯仔、番薯和人造合成樹脂製成膠米走私出口，柴米油鹽樣樣可以造假，論到一些不法商人的創新製造技術，中國認第二，恐怕都無邊個敢認第一。

歐股ETF又可留意

眼見三月確認QE規模之後，歐元反底，不跌反升，四月下旬的債市黑天鵝，歐債孳息狂抽，德國十年期債由0.05厘歷史低位，一彈去到近0.75厘，歐洲央行急補鑊搵執委科爾開聲，話會提早買債計劃，亦都暗示息口低於零政策問題唔大。言論令隔晚德、法股市大升，歐元大插，債息行返轉頭。

在歐央行擺出一副歐元可跌不可升的姿態下，估計短期因為怕歐洲經濟無預期咁衰，歐版QE未必玩得好耐而引發的歐股調整可能告一段落，歐股ETF的又可以諗吓搭一搭順風車。

買暴動股自求多福

講番個市，港股昨埋單跌108點報27,585點，主戰場係一眾市值上百甚至上千億的二三線股。四月中港股爆升前已升到無人信的漢能（00566），朝早狂瀉近四成七後拉閘，街外傳言四起。睇番漢能由三月高位9.07元，撻到落昨日停牌前收報3.91元，市值蒸發2,150億元，差唔多夠錢為三跑兼高鐵找數，或等於希慎（00014）、新世界（00017）及會德豐（00020）一齊消失。

隨着港股愈來愈A股化，這類狂升暴跌的股份真係愈來愈多，唔少散字派認為係十年難得一見的發達機會，可能古勝已變得保守，反而覺得依家通街「土製菠蘿」，要搵到隻股票可以重錘出擊愈來愈難。好似漢能、恩達（01480）之類的喪炒股，唔貼市肯定玩唔起，即使睇到實，見到唔多對路想止蝕，閃跌之下已輸到見骨，甚至乎拉埋閘，好似曱甴屋一樣有入無出。

以往但凡有焦點二三線出事暴瀉，一些未見經傳喪炒股，多少會受牽連，惟昨日完全唔覺有咁情況。好似十大勁升股份，無三成升幅入唔到榜不特止，當中七隻成交億億聲，完全「你有你跌，我有我炒」的態度。唔少魚缸炒鬼等住深港通落實通車日期，但依家股市所見，都唔使等正式互通渠道放水，港股經已同A股無異，通埋車之後仲得了！

講番國務院簽批被譽為中國版「工業4.0」的《中國製造2025》，文件涉及的不同產業層面，真係闊到暈，航天、軍工、鐵路、生物醫藥及高性能醫療器械、新能源及電力設備等等，只要有幻想力，幾乎各行各業都多少沾到邊。一方面國策同環境污染開戰，又要推動工業升級，新能源股故事睇落比較實在。

比亞迪有炒作故事

比亞迪（01211）啱啱話投資半億美金在巴西建太陽能電池板基地，目標產能每年400兆瓦，幾乎等於現時巴西全國光伏發電總量四成五，規模唔細，短期推動業績仲係在傳統及電動汽車生意，街外估電力私家車及巴士項目，最快今年，最遲明年可以收支平衡甚至有微利，業績強勁復甦的故事可取，破咗50元要睇。

另一隻華能新能源（00958），四月初因公募基金入市消息，爆上3.71元之後，股價不但止無大幅調整，反而以逸待勞，在3.13至3.5元之間橫行消化。新能源股有國策支持，始終同喪炒股係有分別。今年首季業績，盈利升五成七至4.58億元人仔，超大行估計主要拜期間風電發電量比估計強勁。

睇番舊年第二、三季，來自風電收入基數極低，業績延續較大幅的增長機會十分之大。華新能一五年14.2倍PE，以未來兩年大約兩成的年增長率，估值應該仲有水位去，守住3.5元，第一站先睇4元。

賺三成二

司慕渢於本月十五日推介大悅城地產（00207），其後股價輾轉向上，昨日以近高位報收，高低位計累升32%！

古勝