絲絲講場：子女理財 星級教材
全世界阿爸阿媽都有一個共同煩惱，就係點教仔教女。唔理幾有錢都一樣要教仔女，以下八位頂級名人教仔女搵錢理財，各有自家一套獨門秘笈，埋嚟一次過極速偷師，教自己都仲得。
為仔女捐錢做慈善
想仔女知你有幾愛佢，米高彭博認為，最佳方法就係捐錢，捐畀啲可以令世界變得更美好嘅組織，除咗為啲仔女好，亦為埋啲仔女嘅仔女。
《彭博》創辦人 米高彭博
唔畀仔女做富二代
雖然蓋茨副身家有787億美元，但佢嘅仔女冇份做富二代，皆因呢位阿爸認為，留太多錢畀仔女反而唔好。蓋茨將身家密密捐造福社會，仔女每人「少少哋」分番1,000萬美元（即係7,800萬港元）就夠。
微軟創辦人 蓋茨
放手畀仔女試一試
Marcus最重要係畀空間啲仔女自己去試，不論係畀空間佢哋去成功，或畀機會佢哋去失敗。若果父母睇住照住，成功同失敗都冇仔女自己份。何況趁仔女仲細，就算做錯決定蝕咗錢，咪當畀佢哋買個教訓。
家得寶（Home Depot）創辦人 Bernard Marcus
要做家務賺零用錢
碧咸講到明，想要零用錢就要做家務。零用要賺番嚟，先唔會亂Fing。咸爺唔係要求仔女洗衫煮飯一腳踢，簡單啲好似將碗碟放入洗碗機，又或者自己執番床鋪，咸爺已經收貨，但唔知Victoria收唔收呢。
球星 碧咸
自己搵錢先會珍惜
錢，一定要自己做嘢賺番嚟。Chatzky自己11歲已經去做保母搵錢，所以佢好明錢要自己賺番來先會珍惜。而且，打工仲幫到仔女賺到工作嘅滿足感，連自信心都返番嚟。
理財專家 Jean Chatzky
Upgrade知識最緊要
佐治魯卡斯非常重視教育，鼓勵家長重視仔女嘅學習，佢唔係得個講字，佢打算將大部分身家捐出去提升教育質素。
《星戰》導演 佐治魯卡斯
須從錯誤中學習
「唔計劃就包失敗」、「學得多賺得多」、「從自己同人哋嘅錯誤中學習」就係巴菲特教仔女嘅理財觀。股神仲成立咗「百萬富翁秘密俱樂部」，拍埋卡通片教小朋友理財大道理。
股神 巴菲特
一味靠嚇推動搵工
O'Leary唔單止唔畀仔女喺溫室成長，仲直頭要仔女知現實有幾殘酷，仲話恐懼先係推動力，「如果唔識驚自己一家大細餓死，仲有啲乜會推動你去打工？」
創業真人Show《Shark Tank》投資者 Kevin O'Leary
余絲韻