孖妹S檔案：炒藝深造 學A股化

內地大戶睇重分析

徐：齊魯國際首席策略總監 徐燦傑

彩兒：中央放水後，內地資金真係多到你唔信，個個都心急要搵好路數，為免A股過熱，政府咪推措施「排洪」，資金就湧入香港。

徐燦傑指，本港投資者目前應練習耐性，千祈唔好賺粒糖，輸間廠。	何文俊認為內地缺乏衍生投資工具，促使投資者偏愛炒細價股。	90後A股股民Betsy偏好短炒，只會選強勢板塊。

徐：十年前港股有400億至500億元成交，大家已拍手叫好，但港股目前已出現新常態，進入以1,500億元成交為底線嘅新時代。因為內地投資選擇多，當地投資者不會滿足於一至兩成的投資回報，所以目前應要練習耐性，千祈唔好賺粒糖，輸間廠。

細價「妖股」陸續有來

目前來港嘅資金以機構投資者及大戶為主，但係內地投資者同本港投資者炒藝都幾唔同。部分大戶炒法比我想像中理性，唔係用土豪式炒法，佢哋着重技術分析，鍾意貨源歸邊嘅股份，貪夠乾身容易炒，又鍾意上網收風或使用人脈投資法，一般抱着寧可買錯，不可放過嘅心態，比本港股民勇好多！

Kitty：喺新常態下，啲股價飆得咁勁，點分平貴？

徐：喺資金市入面，估值或已變成「估你值就值」，相比P/E（市盈率），內地投資者更相信P/D（Price/Dream），即憧憬消息，預計市況波動性會提高，細價「妖股」勢不斷出籠。

同埋內地投資項目太多，但方便「抽水」的平台太少，香港「殼股」有價有市，特別係上市兩年以上，根據上市規則可被全購嘅股份，內地投資者對此更有興趣，全因想有一隻殼股傍身，而且他們更擺得起。

徐燦傑三招「炒功」

1. 「蜻蜓投資法」揀股

投資者不妨先揀強勢板塊，好似互聯網+概念股及券商股，其後以「蜻蜓投資法」揀股，佢內含四個主要分析方向：基本因素、技術因素、財技因素與價量因素等。最後兩者係重點，應結合佢哋嚟做分析，財技因素，好似供股、合股、配股，仲有發CB（可換股債券），公司會利用上述方法改善公司財務狀況，有機會刺激股價，一旦有技術因素，例如股價有成交配合，而且一浪高於一浪，基本面問題不大，股價就有機會上揚。

2. CCASS查股權分布

《中央結算系統持股紀錄》（CCASS）查詢服務，係用嚟查閱股份股權分布，若股權集中，出現貨源歸邊，則表示股份「夠乾身」，容易舞高弄低，投資者只需配合圖表分析，就可以部署投資策略。以「癲股」恩達（01480）為例，截至上周四，呢隻股已發行股本或已流通股份只有24.97%，但持股最多的兩家券商，合共已持有13.49%，推斷股權相當集中，股份便成炒作目標。再者，亦可在披露易發掘公司消息，推敲公司動態。

3. 吼波動股要似偷情

投資波動性的股份要似足「偷情」，先留意細微行為變化，預計未來可能性；不宜事先張揚，尤其係貨源歸邊嘅股份，莊家容易察覺到「第三者」出現，任何風吹草動或者令本來希望入市嘅投資者卻步，所以唔應該set價入市，宜直入直出。另緊記「自己不是股神，只是大市中一粒微塵」，亦要訓練個人EQ，以免被波動性震走。

A股反而「港股化」？

何：交通銀行香港分行環球金融市場部經濟及策略師 何文俊

Kitty：個個都喺度講緊港股「A股化」，點解你死都唔認同啫？

何：內地推出滬港通，以至未來嘅深港通，係希望內地可以利用本港超級聯絡人嘅身份，與國際接軌，而本港股市發展歷史都咁耐啦，依家小型股喪炒嘅情況，以前都出現過好多次，反而內地股市係發展初階，相信未來會出現A股「港股化」，但唔會係港股「A股化」。

成交新常態 指數新階段

內地股民偏愛「炒小、炒差、炒新」，每次本港出現大升浪，都會有「仙股變毫子股，毫子股變蚊股」的現象，而小型或經營不善嘅公司兼併活躍，殼股亦成為炒作對象，回顧○七年本港都出現過紅籌熱，可見A股玩法喺以往港股牛市熱潮曾出現。值得一提的是，內地缺乏衍生投資工具，才促使投資者偏愛炒細價股。

彩兒：即係你覺得依家港股新常態係單純受惠於國策？

恒指喺九七年曾喺四個月內升三成，都曾經喺○七年三個月內升五成，兩個時期嘅癲升同因對一些未發生事件嘅憧憬，前者主因香港回歸，後者歸因於港股直通車，但相比之下，港股今年內僅升17.87%，即使較A股年內升33.2%，港股升幅亦相距甚遠，相信目前港股朝健康上升步伐走，受惠內地經濟與市場結構性改革，港股成交新常態係1,000億元以上，而政策帶嚟嘅波動台階為28,000至30,000點。

何文俊兩招「炒功」

1. 「新常態」幻滅即閃

目前推升股市嘅力量係靠資金持續流入，同埋市場對內地結構性改革嘅憧憬，而非基本因素好似經濟增長嘅支持，所以中港兩地屬政策及資金市。內地近期政策屬中期改革，需時一至兩年先可以完成，預計股市升勢最少延續兩至三年，不過一旦港股成交回落至1,000億元以下，就表示「新常態」幻滅，若再加上推升股市嘅措施未有持續落實同出台，投資者就應該果斷抽身。

2. 精挑受惠政策股

喺政策資金市，價值投資法唔啱使，亦都唔應該合埋眼亂揀股，另細價股升勢難以持續，投資者應該精挑長遠受惠政策嘅焦點股，尋覓「下一隻騰訊」搭大牛市順風車，如果唔係盞嘥咗個牛市。雖然唔少國策股都暴升過一輪，但大可喺升浪嘅「Ups and Downs」出入貨，其中基建、環保、金融及科網板塊屬優質選擇；而改進空間較大嘅內需股，釋放改革紅利潛力巨大，係追落後首選，不過要「盯實」相關政策出台，再精挑受惠股。

A股散戶：揀強勢板塊短炒

港股「A股化」呢個詞近期實在太Hit，所以孖妹搵咗90後內地A股股友Betsy分享佢嘅炒藝，當係參考。

B：90後A股股民 Betsy

B：我大學所讀的是金融系，二年級便開始接觸股票，目前主力炒中小型股票，博取較大的收益，但由於壓力較大，多數是短炒，而且只會選強勢板塊，我比較多關注樂視網、中興及中國銀行等A股。

投資靈感主要來自財經新聞及財經網站，也留意有經驗證券經理的推薦，有時還會與朋友互相交流！雖然以前讀書時常用圖表及技術分析，但實戰的話，除非是專業操盤手，一般股民用來炒股的可能性不大。

彩兒、Kitty

若有料報畀彩兒同Kitty或有嘢問，可電郵money.biz@on.cc