Market Insight：iPhone概念股可翻炒

港股A股化唔單止股仔炒得瘋狂，北水南下勝在錢夠多，連大藍籌照樣舞高弄低，業績麻麻兼插過一排的港交所，周五狂抽5%，50隻藍籌總共46隻向上，可見周五資金掃貨都相當全面。

國家要搵虛擬世界救實體經濟，總理李克強呼籲要加快「互聯網+」發展，要有基建配合，尤其內地上網慢的弊病急需解決，工信部要求網絡供應商提速降費，三大電訊隨即推出唔同數據平Plan搶客，畀住些小甜頭用家，提升滲透率。

古勝冇點你

升逾兩成

三隻移動網絡股均做好，中移（00941）升3.6%，聯通（00762）升2%，中電信（00728）則升3.8%。馬雲以26.9億入股瑞東集團（00376），瑞東未復牌，炒鬼玩住因為交易間接由馬雲揸住的21控股（01003），上周四倍升後，周五再升10.6%收4.88元，睇嚟瑞東復牌就立即爆升，幾乎係毫無懸念。

阿里股價預早反映

講開馬雲，上周五阿里巴巴被指控涉及網上A貨問題，被多家奢侈品品牌集體興訴。同日，美國避險基金Third Point披露，於第一季沽清手上10億美元阿里股份。阿里去年九月上市，股價一度炒上120美元，之後級級落，去到早前80美元附近先企定。到前星期，首季業績勝預期下挾上88美元附近，但高位計仍跌了兩成六。

睇到其他好似京東股價都處高位，集體訴訟及短期對股價的不明朗因素，包括約4%股本本周禁售期完結，都預先反映咗。事實上，阿里為攬住合夥人制度，最終揀去有集體訴訟權的美國上市，正所謂食得鹹魚抵得渴，應該有晒心理準備搵定律師團迎戰打假訴訟，相信消息對阿里及系內股票，心理影響大於實際。

上周五，綠地香港（00337）停牌，經大摩配售1.91億全新股，每股作價7.3至7.5元，較停牌前折讓5.4至7.9%，新股T+5交收，公司集資14.6億至15億元，會用作發展互聯網金融及一般營運資金，據知要貨基金一股難求，今日復牌應該有點瞄頭。

一跌成名的恩達集團（01480），被證監會指股權高度集中，上周五再隊19.6%或1.49元，落到6.08元，同一個星期前高位102元相比，簡單講猶如十六碗水煲埋一碗，沿途追入真係杰撻撻。

發布會前掀尋寶熱

值得一提，過去二十年同類型趁貨乾被莊家放紙鳶的暴升暴跌股，話多唔多，話少亦唔少，但有一個共通點，係升之前好少人會跟，反而隊落嚟，散字派係心口掛勇，愈跌愈溝，愈溝愈揩。

由上周五成交有1,500萬股，是四日以來最多，可見空手入白刃的勇者不少，唔好話古勝長氣，玩呢類暴動股，借政府宣傳片，沉迷賭博，真係等於倒錢落海。

手機界廣傳，慣例在六月中旬發表新iPhone的蘋果公司，可能今年會將熱賣的iPhone 6及6 plus，係咁意作硬件升級，個名後面加個「s」賣多一年。有消息話，日本Sharp準備退出後置鏡頭市場，蘋果公司又有意將用了N年的800萬像素鏡頭，趁今次6s進行提升。

股市牽起一輪蘋果公司後置鏡頭供應商的尋寶熱，早排上市的高偉電子（01415），分析員同班芬佬傳到佢好似十拿九穩，好快攞到蘋果公司鏡頭模組合約一樣。

高偉電子望多兩眼

早排外地媒體話Apple Watch有零件出現缺陷，與蘋果公司向來關係甚佳的瑞聲科技（02018）跌到一仆一碌，可見食蘋果奶水大都係有辣有唔辣。

過往經驗，新產品硬件規格推出，通常個市有理無理亂炒一通，舊年iPhone 6推出前，藍寶石屏幕生產商炒鑊勁，之後先知中空寶，高偉會唔會得到蘋果公司寵幸乃後話，此前斷估會繼續炒，上周股價見8元後插返落10日線附近，如果企穩，發布會前不妨睇住有冇機會炒多轉。

古勝