絲絲講場：譚天忠忍着淚說Goodbye
英國保誠（02378）執行總裁譚天忠（Tidjane Thiam）做咗七年，下個月正式過檔瑞信，前日佢最後一次主持保誠股東會，聽講佢鐵漢子一名都眼泛淚光（嗱，絲絲睇唔到，聽講咋），仲搬埋阿媽出嚟。
「凡事最重要係點埋尾」
佢話阿媽教落「做咩事都好，點開頭唔重要，最重要係點埋尾。」咦，同佢一○年收購唔到友邦，差啲搞到落台，到後尾將保誠業績做番靚仔，咁似嘅！難怪佢咁感觸。
想當年譚天忠○九年十月開始坐執行總裁個位，坐咗五個月，就已經想以天價355億美元收購友邦（01299），可惜臨門一腳股東唔制，收購唔到，公司仲好似因為咁損失咗4.5億英鎊，佢就差啲因為咁而要落台。
不過，譚天忠七年來面對各種爭議，佢都可以話未驚過，仲唔單止帶領保誠成為紅底股，依家股價更加突破200蚊。
佢媽咪咁識教仔，乜來頭？原來佢媽咪Marietou唔係普通師奶一名，而是出自科特迪瓦（譚天忠出世嗰度）名門，係科特迪瓦獨立之父兼第一任總統嘅姪女。來頭好強o架。
余絲韻