絲絲講場：小股東嫌希慎「唔縮骨」？
老牌上市公司股東會，好多都有餐食有紀念品送。不過，若然股東會粒燒賣唔啱食，就算公司業績幾靚仔派息幾豪爽，小股東一樣即場詐型冇面畀。
埋怨送長遮好難拎
小股東除咗睇公司賺唔賺錢之外，仲會計較埋股東會有乜食有乜拎，呢個直頭係公司表現嘅另類指標。
希慎興業（00014）尋日股東會，就有位小股東投訴，話主席利蘊蓮明明講過話股東紀念品係啲Handy（易攜）嘢，點知之前係送把長遮，一啲都唔Handy，仲話係送都應該要送縮骨遮先啱，呢位男士仲話利主席同佢對Handy嘅定義差好遠。
絲絲心諗，長遮夠大，希慎送一把畀小股東擋吓雨咪幾好。依家上市公司高層唔易做，（目及）住收購呢類大龍鳳之餘，大至派息，細至連股東會粒燒賣好唔好食、件紀念品小股東冧唔冧，都要應付，簡直考驗佢哋有幾心細如塵。講番呢個「唔夠Handy」批評，利主席答得不慍不火，先講句公司仲有多改善空間，再話紀念品其實各有所好，今次嘅紀念品會易拎啲，希望股東鍾意咁話。
今年派$150現金券
咁今次送乜？係希慎旗下商場食肆30元現金券5張，易拎又現兜兜，連嚟股東會嘅車馬費，怕且都抵番晒，小股東應該收貨喇啩。
股東會有乜食有乜拎？
長和：蝦餃燒賣點心三拼、腐皮卷與叉燒酥、粟米魚肚羹、海鮮炒飯、菇粒炆伊麵、紅豆沙（侍應分好上，去飲咁）
萬邦投資：點心、熏蹄、盆菜，幾圍坐低食
生力啤：場內生啤免費任飲，仲可拎多8罐啤酒返屋企
中電：壓縮毛巾、兩罐香草種子連泥，用環保袋裝住
思捷：曲奇、冷帽，袋仔裝住
港交所：紙包飲品，手快有手慢冇
永旺：旗下百貨公司優惠券及貴賓室通行證
希慎：之前送長遮畀小股東投訴，今年送旗下商場食肆30蚊現金券5張
余絲韻