孖妹S檔案：股壇猛男打遍南北新睇驗
最近有位以急口令式讀稿嘅財經主播紅爆網絡，孖妹都練咗幾次（當然唔成功啦），仲貪得意上網搵咗題普通話繞口令，考吓幾位證券界猛男講得有幾準。近年積極北上掘金嘅佢哋，仲向孖妹分享掘金旅途上嘅趣聞添！
郭思治：市旺不失良「肌」
郭：耀才證券市務總監 郭思治（郭Sir）
Kitty：郭Sir，最近個市咁旺，你仲邊有時間Keep Fit？
郭：滬港通通車後的確忙咗，尤其近月內地股民對港股興趣增加，所以我北上次數都多咗。本來喺香港差唔多日日有Talk，試過星期六朝早講完，即刻又要搭車返內地講。
不過，幾忙都好，我堅持每日做運動，要保持線條美。無計，個人愈大愈貪靚。喺內地講Talk，聽眾有時都會叫我除走件面衫Show吓肌肉，亦有同場男性會請教我健身心得。
止蝕態度各有不同
彩兒：「股壇大隻佬」去到邊都咁引人注目。咁你覺得兩地股民有咩唔同？
郭：我喺投資講座上，主要分析中、港、美股。其實內地股民已經好了解A股情況，但佢哋依然想知香港分析員點睇內地政策同A股。相比香港股民，佢哋少啲問「冧巴」，多啲問外圍市況、資金流等。另外，股價下跌時，香港人會諗止蝕，但內地股民唔會走，因為覺得用錢買咗就係自己嘅。
投資方面，其實我好樂意透過電郵或公司平台同大家溝通，但微信、微博就唔好喇，留番畀我分享私人嘢啦。
潘鐵珊：同的士哥講股
潘：海通國際環球投資策略董事 潘鐵珊（Patrick）
Kitty：恭喜你，連續第三年獲內地網民選為「年度最佳港股策略分析師」！
潘：過去八年，我都有北上出席投資論壇或研討會，所以好多內地股民都認識我。去年滬港通通車初期，最高峰要一個月北上六次，又多咗同香港上市嘅中資公司管理層接觸。普通話已經講得好流利，有時仲畀人問我係咪「同胞」。有次論壇同《貨幣戰爭》作者宋鴻兵同場交流，發現大家對一啲金融事情睇法不一，期間都擦出唔少火花，好享受呢個過程。
網上平台分享睇法
彩兒：你喺微博上面密密Update港股分析，認真勤力。
潘：係啊，除咗微博，其他唔同嘅網上平台我都有開戶，同大家分享我對港股嘅睇法。其實最近兩年我都有研究A股，因為覺得A、H股相關性大，亦會推介個別A股畀客戶。
每次到內地公幹，我都鍾意同的士司機傾偈，呢幾個月的確多咗司機提及股票。佢哋會表現得好雀躍、對股市前景充滿憧憬，亦多咗留意港股。
Kitty： 你咁愛飲普洱茶，同司機大佬們邊歎茶、邊講股，諗得過喎！
吳家順：內地股民愛贏
吳：中國銀盛資產管理董事 吳家順（Thomas）
Kitty：騰訊（00700）係你愛股，WeChat（微信）係內地網民必備Apps之一，相信你同內地投資者一定有偈傾。
吳：內地投資者信奉「名牌效應」，要得到佢哋信任，需要花多啲時間、心思。同香港投資者比較，內地投資者面對基金經理時，會有多啲建議，覺得投資一定要贏。可能因為前幾年喺內地「買樓一定贏」嘅諗法已經植根佢哋腦海，同埋內地有太多（保本兼有回報嘅）理財產品。當一隻基金賺20%時，可能香港投資者已經好開心，但內地投資者可能會無動於衷。
彩兒： 北上搵銀，都少不免要把酒「談心」，對不對（普通話）？
吳：對。其實我之前好耐無飲酒，結果嗰次一飲就「出事」，幾杯落肚已經醉醉哋，仲要同事扶住我先過到關，完全高估咗自己實力。好彩依家唔使點飲（酒）喇，多得內地客戶體諒同尊重，所以嗰次之後，我冇再醉過，哈哈。
蘇沛豐：買H股筍過A
蘇：招銀國際研究部策略師 蘇沛豐（Daniel）
Kitty：北京、上海、杭州、南昌……你就好啦，已經去過咁多個大小城市。
蘇：公司喺內地分行網絡龐大，我由一三年底入職至今，到訪過嘅分行幾乎未重複過，嚟緊或有機會去內蒙古自治區首府呼和浩特。北上主要為分行同事培訓，幫佢哋了解港股，同時向內地股民介紹港股，希望吸引更多客。以前一個月返一次，最近港股旺，變成一個月返兩、三次。但由於公司嘅內地客都係直接來港開戶，所以（北上）同滬港通無咩關係，滬港通通車後反而競爭大咗。
彩兒：你一直只研究港股、少睇A股，同內地股民「搭訕」咪有難度？
蘇：都唔係。佢哋好有興趣買港股，但唔熟，所以我會講解兩地股市有咩分別、買港股有咩優勢等等。試過有人拎住幾個A股「冧巴」問我點睇，我坦白話自己無研究，如果係AH股，咪同佢解釋，「其實依家H股抵啲，買H股好過啦」！
Kitty：你「環遊」咗中國咁多地方，微博一定好多靚相睇啦！
蘇：哈，我微博好耐無更新喇，唔想花太多時間搞，想專注啲寫專欄、做節目錄影。
挑戰普通話繞口令
網上流傳以下呢題好應景嘅普通話繞口令，有人話「Easy汁」，有人就讀到皺晒眉。孖妹突擊測試幾位股評界猛男，大家不妨到tv.on.cc網站，或可掃描QR Code即睇片，幫佢哋評吓分吖。
「沒有人在牛市開始時，就確定牛市是開始了；人們往往是在牛市即將結束時，才相信這是牛市。」
Kitty、彩兒
若有料報畀彩兒同Kitty或有嘢問，可電郵money.biz@on.cc