李君豪轉軚撐收市競價

新制可杜絕「滙控事件」

李君豪接受訪問時表示，當初反對收市競價，是因為有些人可利用趁機圖利，「意思係假如基金有批貨要走，明係要掟，特登放個好低的盤，搵定自己友，基金於臨收市前掟出來，自己友接咗，翌日股價升番正常，賺晒錢。收市競價最好玩就係咁，自己友一定接到，當日滙控（被質）事件都係咁。」

但在新建議下，上述動作基本上做不到，因為收市競價第三階段不可取消盤或抽盤，第四階段更是隨機收市。「換言之，基金再不能臨收市前掟落去，新機制避免佢哋最後一秒至入，如太遲入盤，突然收市就走不到貨，如太早入盤，又去不到呢個價，變相益咗其他人。」

他指，收市競價的第二個問題是市場參與者會傾向在收市前才買賣，日間成交冷清，尤其對期權交易不公平，「因為期權買賣靠莊家開價，莊家就睇吓市場有幾多買賣盤才可開價，如買賣盤少，差價自然闊，令期權喺日間好難做，到收市競價時段期權又不能交易。」

至於「同股不同權」，他之前的確是反對，認為本港不應為了一間公司「出賣」自己，同股同權是最基本價值，但後來深刻反省，發現 「不是黑與白般簡單，好耐之前已轉軚！」

「做創新科技的人，起初都無資本，需要人支持做大，但資本愈大，股權就愈被攤薄，但佢係公司靈魂，冇佢公司就是零。從股東利益去睇，寧願繼續由佢掌舵，定係由沒創意的大基金去控制？如我係股東，我不介意畀晒權佢話事，但當然亦要有保障不能令佢走火入魔，例如突然將公司所有錢捐晒出去、又或批晒啲股票畀自己。」