北水頭等倉：比亞迪搵好位上車
滬綜指三日累跌8%，相信今次調整最多仲有半段路。港股六個交易日亦累跌4%，唔少未及沽貨的昨日都要適量減倉，在高位有及時減倉的就細細注收集實力股試水溫，相信恒指於26,800至27,000點有不俗支持，但何時再開快車就睇北水動向。
昨日一隻異動股乃恩達集團（01480），去年十二月上市，招股價1.23元，昨日高位抽到上35.1元，一度掃清板！區區一隻從事印刷線路板業務的公司，為何市值能於五個月內由3億元升至最高達80億元，確實令人摸不着頭腦！也許是港股A股化又一案例。
乾身半新股炒得瘋
反正身經百戰的香港股民，縱然上市初期上了車，相信升到上5、6元都沽貨獲利冇鞋挽屐走，邊會等到35元？自問藝高人膽大先好沾手，仲要有心理準備沽貨隨時要跳格望空！
不過，值得留意，恩達與同樣累積可觀升幅的半新股集成傘業（01027）有共通點，都是中資券商做保薦人，上市以來股價從未曾失守過招股價，業務性質平平冇本地散戶吼，看來成功將呢類乾身半新股Sell到畀大陸客玩，升勢可以好癲狂。
比亞迪（01211）上月股價衝上52元水平後，眨眼又回落至45元水平。首季度公司錄得1.2億元人民幣淨利潤，據講首季內地九大自主品牌累計銷售新能源乘用車中，近四成來自比亞迪，顯見其領導地位。
去年比亞迪發展受制於電池產能，今年首季新電池廠房投產，料未來兩至三季產銷量具爆發力，可趁調整睇位上車，今年股價可望挑戰高位57.8元。
司慕渢