絲絲講場：內地哭股喪創意攞A

吟詩改圖棟篤笑

尋日微博有消息話，中國嘅綠化率達到90%！吓！睇真，原來講緊股市。唔明？香港股價標示，綠升紅跌；內地相反，紅升綠跌。明冇！

有股民出圖流住兩行眼淚發難「把錢還我，老夫不玩了」；激啲嘅出圖企跳，下面兩位消防員拉住橫額「不要跳樓，等待反彈」。

有內地散戶話，尋日行過一間纖體店，就將個招牌一嘢打爛。何解咁火？原來招牌寫住四個大字：「絕不反彈」。明晒。

有股民唐朝李紳上身，吟兩句Show吓文采：「鋤禾日當午，不如交易苦。對着K線圖，一哭一上午。哭了一上午，還要哭下午。倉位補不補，心裏非常苦。」明嘅明嘅，搵食嘅嘢，「粒粒皆辛苦」嘛。

有散戶慨嘆自己副身家，大前日由「奧迪」（即係歐洲車Audi）變「奧拓」（國產微型車），前日變咗「奧妙」（洗衣粉），尋日再睇已經係「奧利奧」（朱古力餅Oreo）。咁算得係乜！有人話佢去派出所報案，話唔見咗架波子（Porsche），警察問「喺邊唔見？」佢答「喺A股度囉」。

乞兒搭嗲論股價

有股民話，晏晝邊食雞翼邊用手機(目及)住個市，有個行乞嘅埋嚟，股民就分隻雞翼畀佢，行乞嗰位唔走，一齊睇市兼搭嘴話「長期均線金叉，KDJ數值底部反覆鈍化，MACD底背離，能量潮喇叭口擴大，隻股會升」，股民大驚問句「咁你都識？」行乞嗰位答「唔識，我點會有今日」。話時話，明日會點？

余絲韻