Market Insight：康師傅有機會見底

年初至今，泛歐股市累積升11%，日股升10.5%，對比原地踏步的道指及升得1%的標普500指數，查實投資者對聯儲局退市預期，早已令美股狂牛收斂不少。再睇埋估值，標指市盈率17.7倍，對比過去十年11.4至18倍上下區間，目前美股唔算便宜，但考慮正處於歷史低息環境，而二○○○年科網泡沫爆煲前，美股平均PE去到25倍，又唔算得上好離譜。

今日環境，耶倫依然行出來向華爾街吹淡風，的確值得股民諗一諗，係咪有重大的股市危機，佢睇到而我哋睇唔到。有一點毫無疑問，係華爾街玩家同A股大媽一樣，都嫌牛市中子彈唔夠用，孖展借到盡。而三月最新數字NYSE的累積股票孖展借貸去到4,763億美元，是史上最高。要知一旦利率周期逆轉，加埋股市調整的話，死得最慘肯定係一班孖展玩家。

滬綜回試四千關

近排美國經濟數據麻麻，像首季GDP增長似有還無僅0.2%，三月人均收入及開支增幅低過預期，就業市場復甦有量無質。債商計過條數，經已把加息時間共識由六月延遲到九月。經濟復甦並非想像般強勁，加上歐亞風險資產炒味更濃，近排吸引資金流出美元資產，美金高位回落，美債亦腳軟。十年期債息過去一個月由1.86厘彈上2.27厘，升幅兩成二。

聯儲局資產購買計劃功成身退，不再受聯儲局無形之手左右，萬一趨勢持續，債息升得過急觸發美股拋售，肯定非聯儲局所願。或者咁樣解釋到，點解美股唔算癲，耶倫都夾硬話估值高，叫投資者安全疏散的真正原因。

阿爺想用家長式管治A股玩家，顯然大媽唔多受，滬綜指昨再插117點報4,112點，三日跌8%，失守了四月十九日因中證監話規範兩融，人行補鑊立即降準1%，阿爺托住的4,287點，見IPO及券商孖展數緊，近期A股成交級級落，要點先可以止跌，只有天曉得，試一試4,000點看來是勢在必行。

港股六連跌，昨再插350點報27,289點，夜期再踩一腳，開市無耐跌至兩萬七邊，技術走勢睇落好大機會返回四月九日上升裂口位26,247至26,732之間任何一點搵支持。

新一批蟹民被綁

最慘烈係全日近1,400隻股票向下，唔少二三線股仔經過周初高潮後，又綁住了一批蟹民。滬股通額度用超過兩成，是近期罕見，似乎A股大插後開始有清兵撈底。

成個市一個「弱」字可以講晒，炒過一輪的內房、鐵路、內險統統回，恒大（03333）跌8.2%，華南城（01668）跌6.4%，寶龍（01238）跌6.2%，龍湖（00960）跌4.9%，想買的不妨等等。古勝話海螺水泥（00914）穿30元要睇睇，昨跌2.2%報30.45元，漸進入射擊範圍。

寶馬首季業績來自合營華晨寶馬的收益急跌五成二，華晨（01114）因而隊低3.7%收12.8元，美銀美林踩多腳，話近排股價仲未反映四、五月疲弱銷售，目標價降至12.33元，叫減持。睇到報告先出手似乎已太遲，唔夠一個月，華晨已由18.02元高位跌近兩成九。

內地即食麵減價戰，加上零售市道麻麻，康師傅（00322）一四年純利跌2%，對一隻高估值的增長股，殺傷力唔細，其股價由去年八月高位23.25元，一直跌到本月低見15.96元，累跌三成一，完全享受唔到早排升市。過往經驗，低通脹、原材料成本低企對佢有利。

今年業績勢回升

事實上，棕櫚油、麵粉及膠粒等價格都比去年同期低，加埋公司減少參與低價麵食市場，增加中高價產品比例，估計今年毛利率會有改善，等就只係等top line銷售現復甦。基於中國股樓市財富效應，早排講過A股連白酒股營收都開始炒谷底反彈，奇怪係康師傅一類副食品股紋風未動。

康師傅一五年PE啱啱唔夠20倍，以基金股而言算係平，今年業績回升機會甚高，昨日成個市散晒見佢逆市做好，看來熱錢炒完一輪垃圾股遇到教訓，開始跟番基本因素去炒，股價於16元樓下中短線輸面有限，可以睇實。

贏足三成

桃桃於五月六日推介國農控股（01236），當日即抽升逾兩成，昨日曾突破4元關，以高位計累升達31%。

古勝