絲絲講場：恒生銀行家變身能源大使
銀行家返內地睇廠係等閒事，但恒生（00011）企業及商業銀行業務總監林燕勝（Donald）今趟去雲南就好唔同，Donald「驗貨」之餘仲要送禮！冇錯，兼且要「教書」，連Donald都話咁樣係第一次。究竟乜事？關「便便」嘅事。
助雲南農村化「便」為能
咪睇小「便便」，「便便」發酵釋出嘅沼氣，可以轉化為能源。恒生早就同環保組織合作，喺雲南資助興建多個沼氣設施，幫啲農戶改建豬欄、廁所、廚房，用人同豬「便便」釋出嘅沼氣嚟煮飯同照明。發酵完剩番嗰啲，仲可以餵魚種菜做肥料。
Donald今次帶住班義工，去當地農村驗收舊年完工嘅沼氣能源設施，佢仲去埋當地小學講解沼氣能源知識，仲向村民送義工織嘅「溫暖牌」冷頸巾添。今次都係Donald嘅第一次，佢話又難忘又感動。
呢個沼氣能源計劃，恒生已經行咗八年，打算總數起4,600個設施，可以縮減嘅碳排放，可以保護到等於115個九龍公園咁大嘅樹林o架！
余絲韻