絲絲講場：積金追港股有數計
呢排港股熱炒，絲絲自問無方展博睇股咁準，就諗住將份強積金All In落港股基金嗰度，諗住有基金經理睇實，又叫做湊熱閙有入過吓市，無執輸啦。錯！MPF達人余天佑（Elvin）話咁做，係大錯特錯。
亞股回報長遠贏債市
Elvin係德盛安聯中華及東南亞機構業務總監，佢語重心長咁話：「MPF係講求長遠紀律嘅投資，點可以用嚟捕捉短期股市升幅呢？分分鐘等你轉得嚟，個市都升完啦。」
嗱嗱嗱，同場唔止絲絲一個唔熟呢啲，德盛安聯呢個退休信心調查發布會，擔任MC嘅前主播方健儀都話，佢自己一向比較懶，又唔識投資股票，通常都係等轉工先睇吓個MPF戶口。Well，方健儀對上兩次轉工，都似隔咗成六年......
100-歲數=積金持股比例
個市係咁升，絲絲唔通淨係得個睇字？Elvin安慰話，中港同亞洲股市嘅前景的確好過債市，長遠嚟講，大家確實可以諗諗加大MPF入面嘅股票佔比。
咁點加法？Elvin教路，坊間有條Formula：「100減歲數=投資股票的理想佔比」，可以參考嚟調整投資組合。假若閣下25歲，100-25=75，即是可以擺75％落股票度喇。不過，重點都係要分散投資，咪諗住All In。仲有，就係咪真係當自己年年25歲。
Elvin仲分享埋德盛安聯最近一項退休信心調查，受訪港人嘅理想vs實際退休金額差距，收窄到150萬港元。何解？原來係大家無再咁大想頭，調低咗理想退休金額「目標價」香港人到底係面對現實咗，定悲觀咗呢可。
余絲韻