長和（00001）與和黃（00013）完成重組前嘅最後一份年報出籠，和黃董事總經理霍建寧計埋薪金、花紅同津貼，一四年按年加咗4.3%，袋多811萬元，即是一年收入去到1.963億元，繼續係長和系最高薪嘅管理層。
照絲絲睇，霍大班一年做足365日、每日12個鐘都投入工作，呢個假設都唔算太過，咁計霍大班即是月袋1,635萬，日薪53.7萬，時薪4.4萬，每分鐘係746元，再數落去，秒薪係12.44元！嗱，咁就係超級打工皇帝嘅級數。
至於「老闆級」嘅長和副主席兼董事總經理李澤鉅，計晒佢喺長和、和黃及長建（01038）實收人工係1.447億元，比一三年加咗5.3%，論「加薪」幅度跑贏霍大班。嗱，仲未計李澤鉅作為長和大股東所獲股息，你話實收邊個多？
睇真兩份年報，點解霍建寧嘅「長和聯席董事總經理」職銜仲未生效？年報又無如以往咁交代股東周年大會嘅舉行日期？皆因呢個世紀重組要到六月三日先叫完成嘛。
余絲韻