絲絲講場：馬雲奔波勞碌「名」中注定

阿里北京開員工大會，馬雲話阿爸幫佢改呢個名，有「馬」又有「雲」，即係「天天在空中，天天在奔跑」，話自己忙到日日唔同城市飛嚟飛去，佢認命。無端端同員工講呢啲？嗱，下文嚟喇。佢跟住就話啲員工，你哋都一樣，邊個叫你入咗阿里，跟咗個咁嘅人，你嚟咗，就認命，既然認命就好去努力。See！

馬雲又話阿里擴張過快，現時3萬幾員工乜都夠晒，所以今年一個Headcount都唔會加，走一個先請番一個。至於有啲公司上到8萬人，佢話上帝祝福呢啲公司。咦，講緊京東？

馬雲又叫人千祈咪信「初創公司啲人包勁」，事關頂尖高手都唔會入初創公司，初創入面一般只有一、兩個人得，其他絕大部分係垃圾。無錯，馬雲真係用「垃圾」呢兩個字。佢嘅結論係：阿里唔挖角，寧可自己培訓。

余絲韻