絲絲講場：小加屋企仲有個董事長

港交所價靚 股東嗒糖

尋日港交所開股東大會，呢排港交所股價好似坐火箭咁狂升，啲小股東就梗係好滿意啦，仲好罕有咁一條問題都無問管理層。

反而有媒體問小加總裁，揸住啲港交所獎授股份，會唔會趁股價咁高，沽貨套現？小加總裁又爆金句，話自己有足夠的錢可以花，再者佢屋企董事長有另一個人咁話！絲絲明晒，小加喺出面幹大事搞互聯互通，兩地股市變化翻天覆地，返到屋企，都係聽老婆話。

小加平日都係Family Man，如果唔係出差，平時放假都鍾意陪家人呢度去嗰度去，每逢有長假，都會到外地旅行。

小股東狂掃紙包飲品

今年港交所股東會仲有一個特別地方，係出席嘅小股東人數比往年多，有成二百幾人，逼爆會場，仲個個蓮子蓉咁臉口。有位婆婆小股東，講開港交所股票，就眉飛色舞，話自己百幾蚊買入，早排見200元就沽、之後一路升一路沽，依家剩番1,000股，死都攬住唔放。

小股東個個賺到笑，股東會散場後，攞紙包飲品一樣眼明手快。其實一手港交所閒閒哋都成3萬元，包紙包飲品邊度係錢呢可。

余絲韻