Market Insight：中國銀河可搭順風車

雖然執筆時未知議息結果，但睇見近排美國經濟數據相當麻麻，應驗了年初在下的估計，今年市場最大的失算，可能係美金狂升之後，美國經濟復甦受壓抑唔及預期理想，令到聯儲局在息口加與不加之間進退維谷。

月中至今數據，美國新屋動工數字差過預期，三月通脹比預期低得0.2%，三月耐用品訂單撇除國防開支及民航機訂單，實則出現0.2%倒退，遠差過市場預期的增長，四月消費者信心亦意外地回落，可以預期，在上一份議息聲明收番「耐心」字眼，一副未來議息次次有可能加，又有可能唔加的姿態，其實息口去向透明度仲差過以前。

古勝冇點你	萬里長空	進帳一成三

一連串差到極數據，華爾街主車群的預測，由六月首加推到九月，古勝維持之前大膽估計，今年美國加唔到息機會仲係較高。睇相佬呃你十年八年，七個月之後看官就知有冇睇錯。

成交續縮應要提防

講番個市，四月期指同期權結算，港股沒有驚濤駭浪場面，唯獨見到A股收市前，五月期指失驚無神由28,347殺到落28,132點，有超過兩百點途程最後抽番凸收。打電話四圍八都唔知發生乜事，甚至唔少炒家無留意到，顯然依家期指兩三百點上落已經係炒家眼中新常態，唔當一回事。昨日恒指跌42點收報28,400點，主板成交縮到得1,630億元，乃四月八日嗰一周，因為北京話放私募基金經港股通入市，出現2,915億元成交以來最少一日。

唔好話杞人憂天，雖然港匯仲企穩強方兌換保證價，本地銀行體系結餘維持3,106億元，同○九年歷史高位3,200億相差不遠，反映在港股圍爐取暖的熱錢仲係充裕。表面上，睇市睇升是無懈可擊，不過資金市難玩正在於嚟得快去得快，搵到食留多陣，搵唔到可以即走。

近排去中環食晏，周圍見人人睇住部手機報價，高談闊論買邊隻，真係十個睇市有八個睇升。昨日沽空佔大市成交比例跌穿7%，對上一次已經係一三年十一月，可見淡友都靠邊站甚至加入好友陣營。結算後，大市會否比全民看升的情緒來一個意外驚喜？先來一個震倉其實唔出奇，總之看官們全情投入都要保持三分理智。

證券商首季賺到笑

A股愈升愈狂，中國人壽（02628）首季保費收入升16.5%，但投資收益卻大升58.8%去到383.8億元（人仔‧下同），推動首季純利大升69.8%至122.7億元，年度化淨投資收益率及總投資收益率，分別4.65%及7.67%。受惠於A股的仲有一眾內地券商，中信証券（06030）首季歸屬上市公司股東淨利潤38.17億元，按年大升191%，海通證券（06837）首季利潤41.02億元，按年大升238%，廣發証券（01776）首季利潤25.17億元，升204%，幾乎已經等於一四年全年業績一半之譜。

內地全民皆股，A股帳戶數字終於突破2億，兩市融資餘額也升至1.82萬億元，而且仲繼續創緊新高。避險考量，券商一方面降低兩融折算率，即係我哋所講的孖展成數，但依然唔夠資本應付不斷開戶新客的融資需求，最直截了當，自然係趁估值高企向街外伸手。

中國銀河（06881）以非公開方式，向不少於六間機構發行20億股H股，每股作價11.99元（港元‧下同），募集資金達到239.8億元，作價比周二收市價12.34元折讓2.8%。股市有陰晴圓缺，A股可以好幾耐無人知，個個參與者都想盡快搵到銀，股民如是，券商亦如是。搵幾個大孖沙圍晒飛的做法，肯定令到部分想同樣有平價加注機會，分一杯羹的小股東心有不甘。

批股價作短炒參考

咁做係咪公平，並不是在下想研究的重點，今次誇張之處，在於批股規模比一三年IPO時發行15.7億股仲要多，以集資額計，更係較當年區區106億元多出不止一倍。

今次收埋食，幾個單位接晒成手貨，仲要折讓咁奀，都咪話唔厲害，似乎強手極為睇好後市，批股價11.99元，應可作為搭順風車短炒的參考價。

古勝