「Google Google，話我知呢個世界上邊啲衫最潮？」「Google大神」話，依家最潮係Emoji印花跑褲同薄紗半截裙。無花無假完全有大數據支持，係根據一二至一五年嘅服裝搜尋數據所得，總共60億項搜尋！
Google仲將呢啲資料整合成時裝潮流報告，一年出兩次。Google啲時裝客仔包括Wal-Mart同Gap，啲資料唔講得笑，絕對係時裝網店嘅寶藏。個報告仲教啲時裝網店，要吸引啲80後90後幫襯，首先係要有片！
佢哋仲講埋，邊個時段對啲時裝網店最重要，一定要有人守住，原來係晚10到朝4。
不如講番潮，Google大神話，超窄緊身牛同單膊泰山裙，可以扔得，利伸：絲絲兩樣都冇，亦呢世都唔會有。至於乜嘢嚟緊會興？除咗emoji跑褲同薄紗裙外，竟然就係及膝裙，佢嘅搜尋次數過去三年升咗九倍！話仍然係個初浪中，仲有排Hit。不過有樣興緊嘅，包你估唔到亦睇唔出，係乜？係腰封。
Emoji印花跑步褲、薄紗半截裙、及膝裙、大闊腳褲、高腰喇叭牛、高領口Bikini Top、腰封
超窄緊身牛、單膊泰山裙
余絲韻