絲絲講場：上商董事齊齊「撐」樓梯
銀行界呢排興放售物業吸水，但上商就偏偏鍾意有樓揸喺手，近年仲落重本翻新中環總行大樓添。雖然總行大樓依家沙塵滾滾，電梯都未整好，但預計等多一年就可以正式入伙，尋日係佢哋嘅平頂禮，絲絲見識到真正嘅「堅」，係老而彌堅。
尋日上商全體管理層齊齊出動撐總行平頂，絲絲一望，大廈樓高28層！好彩，典禮喺5樓。上商位位董事着住西裝、帶埋安全帽，齊齊「撐」足五層樓。絲絲梗係一齊「撐」啦，只係上4樓，抖咗一抖啫。
92歲董事長腳力好
講到Fit，點都唔夠上商董事長榮鴻慶嚟，老榮生佢今年92歲，何止精神，簡直係犀利，佢平日好低調，尋日一出場就自己「撐」足5層樓，完全無出貓！連阿仔榮智權都忍唔住讚句「老竇好嘢！」絲絲惟有滴住汗認自愧不如。
常務董事兼行政總裁郭錫志就話，上商策略都係希望分行盡量係自置物業，加上依家資本夠，唔需要賣樓。至於下一步，就係重組旗下西環吉席街同旺角嘅物業組合，可能會好似中環總行咁，一半出租一半自用。
余絲韻