絲絲講場：內地炒股必備救心藥
睇住內地股市近排啲升升跌跌，日頭同下晝忽然就兩個世界，股民有如玩緊Bungee Jump，心血少啲都唔掂，內地唔少股民炒股炒到入廠，輕則血壓爆升見暈，重則喺部股票機前心臟病發，聽講淨係長沙一間醫院已經收咗幾十個「個心頂唔住個市」嘅股民。
精神科生意跟大市升
內地股民唔少係長者，家陣市況咁，最驚驚嘅係啲仔女。話說有位王生，佢阿爸年過70，又有高血壓，醫生交代過唔可以受太大刺激，但阿爸每日至愛係去證券行「消遣」，阿仔邊敢剝奪阿爸心頭好，不孝，惟有每次阿爸出門口前，都塞盒救心藥入佢袋。阿仔有次陪阿爸去證券行，發現成個場大部分長者股民都有盒傍身。See，中國人幾重孝道。
有啲情況，個心頂唔住，連食藥都無用。內地中南大學醫院精神科張醫生話，呢個月就睇咗近60個股民嘅「症」，有啲又係仔女帶住嚟睇。
又話香港股市A股化，上落都似埋內地市，咁香港又點？證券行藥箱有無準備多幾支藥油？
港魚缸未見樂極生悲
致富證券西環分行經理Anthony同絲絲講，依家市況咁暢旺，股友笑到見牙唔見眼，開心到唔舒服就未見有。咁以往呢？原來真係有，話說喺○七、○八年時個市升唔停，聽聞有位老人家炒窩輪賺到好多，一時開心得滯，好彩只係見頭暈啫，搽完藥油無事！
陳婆婆：唔炒唔知身體好
65歲嘅香港股民陳婆婆就同絲絲講「依家日日落行睇股票，其實都好緊張o架，啲股價成日畀人推高壓低」，佢話好彩自己身體好，「血壓唔高，手心無出汗！」不過，陳婆婆都話唔係個個好似佢咁定當，「有啲老人家賺輸一蚊幾毫就鬼殺咁嘈，係咁叫話好熱！好明顯係佢哋炒股緊張，自己炒到出晒汗。」
余絲韻