絲絲講場：李彥宏每日畀人撬牆腳

好多人都話「工字無出頭」，創業先係理想出路。不過講就容易，要創業，首先一定要有一筆資金，唔係嘅話「夢想」永遠都只係「夢想」。不過，如果依家有人肯打本畀你做生意，你又會唔會去？

唔好以為絲絲講笑，現時內地創業投資基金資金氾濫，創投基金（VC）活躍度極高，好似百度創辦人李彥宏就笑言，佢公司樓下間Coffee Shop每日都有各式各樣嘅VC長駐，日日都主動搵佢公司啲員工傾偈，鼓勵佢哋去創業，真係名副其實嘅送錢上門。

不過，並非人人都可以成為佢哋嘅招攬對象呀，VC其實係根據佢哋心中嘅黃金創業組合嚟搵人，即係集合內地3大科網巨頭BAT嘅人才，包括百度嘅工程師、騰訊負責產品嘅人，以及阿里嘅營運代表。嘩，咁咪即係集三大公司嘅優點於一身？直頭係無得輸啦！

所以話呢，要有人肯投資落自己身上，最重要嘅都係要有過人嘅才能，如果你自問有以上其中一項特點，不妨考慮北上自薦，話唔定可以創出一片天呢！

余絲韻